Պուտինը Մակրոնին հայտնել է, որ դեմ չէ ՄԱԳԱՏԷ-ՌԴ-Ուկրաինա ձևաչափով հանդիպմանը

ՌԴ նախագահ Վլադիմիր Պուտինն իր ֆրանսիացի գործընկեր Էմանուել Մակրոնի հետ հեռախոսազրույցում քննարկել է Մոսկվայի և Կիևի միջև բանակցությունների ընթացքը և պատրաստակամություն հայտնել շարունակել երկխոսությունը, եթե կատարվեն ռուսական պահանջները։ Այս մասին հայտնում է Կրեմլի մամուլի ծառայությունը։ «Վլադիմիր Պուտինը տեղեկացրել է Ռուսաստանի պատվիրակության և Ուկրաինայի ներկայացուցիչների միջև բանակցությունների իրավիճակի մասին։ Պատրաստակամություն է հայտնել շարունակել երկխոսությունը՝ ռուսական հայտնի պահանջների անվերապահ կատարման պայմաններում»,- ասվում է հաղորդագրության մեջ։

Ինչպես նշել են Կրեմլում, «գլխավորն այն է, որ ուկրաինական կողմը պետք է լրջորեն մոտենա պայմանավորվածությունների ձեռքբերմանը, որոնց իրականացումը կարևոր է ռազմական գործողությունների դադարեցման համար»։

Պուտինը նաև մատնանշել է Մակրոնին, որ Կիևը չի կատարել մարդասիրական միջանցքների վերաբերյալ պայմանավորվածությունները։ «Քննարկվել է բախումների շրջաններից խաղաղ բնակչության տարհանման հարցը։ Վլադիմիր Պուտինն ուշադրություն է հրավիրել այն փաստի վրա, որ Կիևը դեռ չի կատարում նման սուր հումանիտար հարցի շուրջ ձեռք բերված պայմանավորվածությունները», - ասվում է Կրեմլի հաղորդագրությունում։ Մասնավորապես նշվում է, որ չնայած մարտի 5-ին ռուսական կողմի հայտարարած «լռության ռեժիմին»՝ Մարիուպոլից և Վոլնովախայից խաղաղ քաղաքացիների և օտարերկրյա քաղաքացիների դուրս գալու համար, ուկրաինացի ազգայնականները թույլ չեն տվել տարհանել մարդկանց այս քաղաքներից և դադարեցնել ռազմական գործողությունները միայն իրենց դիրքերում ուժեր և միջոցներ հավաքելու համար: Պուտինը նաև ասել է, որ Զապորոժյեի ատոմակայանում տեղի ունեցած միջադեպն ուկրաինական արմատականների ցինիկ քարոզչական արշավի տարր է։ Ռուսաստանի Դաշնության նախագահը Մակրոնին հրավիրել է ակտիվորեն աշխատել Կիևի իշխանությունների հետ՝ միջազգային մարդասիրական իրավունքի նորմերին համապատասխան գործելու համար։

Պուտինը նաև ասել է Մակրոնին, որ դեմ չէ ՄԱԳԱՏԷ-ՌԴ-Ուկրաինա ձևաչափով հանդիպմանը, բայց՝ ոչ Չեռնոբիլում, այլ երրորդ երկրում կամ էլ՝ տեսակոնֆերանսի միջոցով