«Բաքուն նոր սադրանքների նախապատրաստություն է տեսնում». Տաթևիկ Հայրապետյան

ԱԺ նախկին պատգամավոր Տաթևիկ Հայրապետյանը գրել է. «Չավուշօղլուի այս չարաբաստիկ այցից մեկ օր անց՝ այսօր, Ադրբեջանը գնում է նոր լարվածության Հայաստանի հետ սահմանին, ըստ ՊՆ պաշտոնական տեղեկատվության՝ ունենք մեկ զոհ և մեկ վիրավոր:

Ադրբեջանն արդեն մոտ մեկ ամիս է շարունակաբար կեղծ տեղեկատվություն է հաղորդում, թե իբրև հայկական կողմերը հրադադարի ռեժիմ են խախտում, դրան հաջորդում է ժխտում մեր կողմից: Այդ փաստը ցույց էր տալիս, որ Բաքուն նոր սադրանքների նախապատրաստություն է տեսնում, ընդամենը կարիք ուներ Անկարայի հավանության, որն էլ ստացավ:

Իսկ այդ ընթացքում մեր ԱԳՆ-ն հայտարարում է, որ Չավուշօղլուի կողմից ասված «Զանգեզուրի միջանցքն» իր համար անհասկանալի խոսույթ է, իսկ խաղաղության պայմանագիրն էլ՝ առաջնահերթություն: Ինձ համար էլ անհասկանալի է, թե ինչու չեք ուզում հասկանալ ադրբեջանա-թուրքական պարզ ու հստակ օրակարգը, ինչու անբովանդակ ու անատամ տեքստերի փոխարեն աշխատանք չի տարվում, օրինակ՝ կարելի էր զանգել իրանական կողմին և ևս մեկ անգամ վերահաստատել մեր բարեկամ գործընկերոջ մոտեցումն սահմանների փոփոխության անթույլատրելիության հարցում, ինչը բազմիցս հրապարակվել է: Կամ, նշել, որ ձգտում եք խաղաղության, ինչպես և նախկինում, բայց ադրբեջանական սադրիչ պահվածքը տապալում է այդ ջանքերը:

Մի բան պարզ է՝ միակողմանի խաղաղություն չի լինում, իսկ Բաքվի ու Անկարայի առաջարկած խաղաղությունը դա իրական կապիտուլյացիա է արդեն»: