«Հետաքրքիր զարգացումներ են տեղի ունենում Ռուսաստանում». Տ. Գրիգորյան

Արցախի «Ազգային վերածնունդ» կուսակցության անդամ Տիգրան Գրիգորյանը ֆեյսբուքյան իր էջում գրել է. «Հետաքրքիր զարգացումներ են տեղի ունենում Ռուսաստանում: Ռուսաստանցի հայտնի լրագրող ու հեղինակ Անդրեյ Սոլդատովը, ով ռուսաստանյան հատուկ ծառայությունների լավագույն գիտակն է ու լուրջ կապեր ունի համակարգի ներսում, նշում է, որ ԱԴԾ (ФСБ) 5-րդ ծառայության (Օպերատիվ տեղեկության ու միջազգային կապերի ծառայություն) պետ գեներալ Սերգեյ (Օրեստովիչ) Բեսեդան ու նրա տեղակալներից մեկը տնային կալանքի տակ են առնվել:

Սոլդատովի աղբյուրները նշում են, որ 5-րդ ծառայության դեմ ռեպրեսիաների պատճառն Ուկրաինայում գործակալական աշխատանքների համար հատկացված միջոցների կողոպուտն է, ինչպես նաև ծառայության կողմից Ուկրաինայի ներքաղաքական իրավիճակի վերաբերյալ բացահայտ սուտ տեղեկությունների տրամադրումը:

ԱԴԾ 5-րդ ծառայությունն ստեղծվել է 1990-ականների վերջին և կատարում է արտաքին հետախուզական գործառույթներ հետխորհրդային տարածքում (ԱՀԾ-СВР-ի փոխարեն): Հայաստանի ու Արցախի ուղղություններով աշխատանքների համակարգումն իրականացվում է հենց այդ այդ ծառայության կողմից: ԱԴԾ 5-րդ ծառայության դերը Հայաստանում ու Արցախում հատկապես մեծացել է Ղարաբաղյան երկրորդ պատերազմի ավարտից հետո: 5-րդ ծառայության գործունեության վերաբերյալ մի կես տարի առաջ գրել էի Սիվիլնեթի սյունակումս:

Սերգեյ Բեսեդան ԱԴԾ ամենաազդեցիկ գեներալներից է, և նրա դեմ ռեպրեսիաները կարող են լուրջ փոփոխությունների սկիզբ լինել ողջ 5-րդ ծառայությունում: Փոփոխությունները կարող են առնչվել նաև այն դեպարտամենտին ու պաշտոնյաներին, որոնք զբաղվում են Հայաստանի ու Արցախի ուղղություններով»: