«Սա է մատնում Իլհամի անհանգստությունը». Վահրամ Աթանեսյան

Քաղաքական վերլուծաբան Վահրամ Աթանեսյանի գրառումը․ «Կարդում եմ արցախցի պաշտոնյաներին, քաղաքական գործիչներին (երևանյան մամուլում նրանց հարցազրույցները հորդում են առատության եղջյուրից)։ Ոչ ոք ուշադրություն չի դարձնում Բաքվի «հինգ սկզբունքների» ամենաէական ձևակերպմանը՝ փոխադարձաբար ճանաչել միմյանց «քաղաքական ինքնիշխանությունը»։ Սա է մատնում Իլհամի անհանգստությունը։ Որովհետև Ադրբեջանը տարածքային ամբողջականության ճանաչման խնդիր չունի։ ՄԱԿ-ի անդամակցությունը դրա երաշխիքն է։ Բայց «քաղաքական ինքնիշխանության» հարցը դամոկլյան սրի պես կախված է այդ երկրի գլխին, որովհետև փոքրամասնությունների ինքնորոշման իրավունքը ՄԱԿ-ի Գլխավոր ասամբլեայի 1970թ․ «Միջազգային իրավունքի սկզբունքների մասին» Հռչակագրով գերակա է տարածքային ամբողջականության նկատմամբ։ Հայաստանը չի կարող ճանաչել Ադրբեջանի «քաղաքական իքնիշխանությունը»։ Ոչ էլ Ադրբեջանը՝ Հայաստանի։ Այդ հարցը լուծվում է միջազգային իրավունքով․ ամբողջական է այն իշխանությունը, որ ներկայացնում է տարածքի ամբողջ ժողովրդին։ Ադրբեջանը չի կարող հավակնել այն տարածքին, որի բնակչությունը չի ճանաչում ադրբեջանական ռեժիմի իրավազորությունը։ Սա է իրավիճակի «մեխը»»։