«Ակնկալում ենք, որ բանակցություններին ընդառաջ ադրբեջանական կողմից մեզ նախապայմաններ չեն առաջադրվի»․ Միրզոյան

«Տիկին Խամոյան, կարծում եմ՝ բոլորիս հայտնի են «բոլոր» բառի ստուգաբանությունն ու իմաստային բոլոր հնարավոր շերտերը։ Ազգերի ինքնորոշումը իրավունք է, կարծում եմ՝ կհամաձայնեք, այսինքն՝ եթե նույնիսկ չհամաձայնեք, իրավունք է, և երբ ես ասում եմ՝ մեզ համար սկզբունքային են և մենք պաշտպանելու ենք արցախահայության բոլոր իրավունքները, ես նկատի ունեմ բոլոր իրավունքները». այսօր ԱԺ-ում՝ պատասխանելով «Հայաստան» խմբակցության պատգամավոր Ագնեսա Խամոյանի հարցին, թե տարիներ շարունակ հայկական կողմի որդեգրած մոտեցումը, որ Արցախի հարցը պետք է լուծվի ազգերի ինքնորոշման սկզբունքի հիման վրա, շարունակո՞ւմ է ձեզ համար մնալ կարևոր և արդիական, ասաց ԱԳ նախարար Արարատ Միրզոյանը։

«Մենք ասել ենք, որ բանակցությունները պետք է տեղի ունենան առանց նախապայմանների։ Սա նշանակում է, որ մենք ադրբեջանական կողմից ակնկալում ենք, և ընդհանրապես միջնորդներից՝ համանախագահներից, ակնկալում ենք, որ բանակցություններին ընդառաջ մեզ նախապայմաններ չեն առաջադրվի, պահելով մեր իսկ բարձրաձայնած կանոնները՝ մենք ինքներս նույնպես նախապայմաններ չենք դնում և չենք կանխորոշում բանակցությունների արդյունքները»,– ասաց Միրզոյանը։