«Հայաստանի կառավարությունը հերթական ապտակն է ուտում Ադրբեջանի ԱԳՆ-ից»․ Աննա Կոստանյան

ԱԺ նախկին պատգամավոր Աննա Կոստանյանը գրում է. «Ցավոք, Հայաստանի կառավարությունը հերթական ապտակն է ուտում Ադրբեջանի ԱԳՆ-ից՝ փաստացի մեղադրվելով սեփական հանրությանը ապակողմնորոշելու մեջ (ՀՀ ԱԳՆ հայտարարությունը որակվում է անհիմն, մանիպուլյացիոն):
Այն նույն ջերմեռանդությամբ, որ ձեր քարոզիչներին ուղղորդում եք մեզ համոզել, թե ռեսուրս չունենք դիմակայելու թշնամուն, դրա համար պետք է ստորացված վիճակում «խաղաղության դարաշրջան» բացեք, և որ անկախ ամեն ինչից՝ այդ օրակարգը տանելու եք առաջ, փորձ անեիք ավելի խորամիտ, խելամիտ հաշվարկներով պատասխաններ ուղղել ագրեսոր Ադրբեջանին, այսօր գուցե զգուշորեն ընտրեր այն բառերը, որոնք հանգիստ շպրտում է ձեր երեսին ու շարունակում անել իր հակահայ գործը։
Եթե նույն ջանասիրությամբ, որով Ֆեյսբուքում կատաղի մարտեր եք մղում հայրենակիցների դեմ, լծվեիք պետության իրական կայացման և ամրացման, բանակաշինության գործին (եթե իհարկե պլաններում լիներ բանակն ամրացնելը), այսօր հերթական կորուստներից գուցե հնարավոր լիներ խուսափել։
Մենք՝ ժողովուրդը, և դուք՝ «Օլիմպոսին բազմած աստվածներդ», զուգահեռ՝ իրար հետ կապ չունեցող իրականության մեջ ենք ապրում, բայց ձեր իրականությունը վիրտուալ է և վիրտուալ խաղի պես փշրվում է:
Ստի ոտը կարճ է. ձեր սուտն էլ բացառություն չի»։