«Հայ ժողովուրդը նոր աշխարհակարգի գաղափարական սկզբունքների ձևավորման խնդրում առաքելություն ունի»․ Հրանտ Խաչատրյան

ՍԻՄ նախկին նախագահ Հրանտ Խաչատրյանը գրել է. «ՊԱՀԱՆՋՎՈՒՄ Է ՓԱՇԻՆՅԱՆԻ ՀՐԱԺԱՐԱԿԱՆԸ (նաև ինչպես)

Տարածաշրջանային ու միջազգային սրընթաց զարգացումների անկողմնակալ ուսումնասիրությունը հանգեցնում է այն եզրակացության, որ Հայաստանի ու համայն հայության կողմից որոշակի հստակ դիրքորոշումների որդեգրման անհրաժեշտությունը հրատապ է։
Փաշինյանի իշխանությունն ինքնուրույն, մի շարք լուրջ պատճառներով, ոչ միայն պիտանի չէ լուրջ շրջադարձերով հագեցած ճկուն փոփոխությունների համար, այլև իր կարծրացած գործելակերպով ամենամեծ խոչընդոտը կլինի այսպիսի արմատական փոփոխությունների ճանապարհին։
Սայլը տեղից շարժելու կարևորագույն պայմանը վարչապետ Փաշինյանի հրաժարականն է։
Մյուս կողմից զանգվածների ներկայիս տրամադրությունները, հասարակության ակտիվ հատվածների անհանդուրժող վերաբերմունքը միմյանց նկատմամբ, ներքաղաքական բևեռների չափից ավելի կախվածությունը աշխարհաքաղաքական բևեռներից՝ խոստումնալից չի դարձնում համարժեք գործընթացների իրականացման հնարավորությունը։
Երրորդ բևեռի լիարժեք ձևավորումը նույնպես ավելի շատ ժամանակ կպահանջի, քան ունենք։
Սակայն վիճակը փակուղային չէ.
Խնդրի լուծումը կարող է երաշխավորել սառեցված մարդկային ռեսուրսի՝ գիտակցաբար ինքնամեկուսացած հսկայական հատվածի ակտիվացումը։ Հասարակության այն հատվածի, ում այսօրվա բևեռների քարոզիչները տգետ, ժեխ ու պողոս են անվանում։
Բնականաբար, հաշվից դուրս չեն դրվում նաև բևեռների կազմում ներգրավված, պայքարի փորձ ու ռեսուրսների տիրապետող ակտիվ զանգվածները՝ որոնք ավելի մեծ վստահությամբ կգնան որոշակի հստակ ուրվագիծ ունեցող նպատակի հետևից։
Առաջնորդի խնդիրը հավանաբար կլուծվի միաբանված ժողովրդի պահանջով՝ հրապարակում եղած միմյանց փոխլրացնող անձանց թիմի ձևավորման միջոցով։
Ֆանտաստիկ է թվում, բայց հուսով եմ մեկ շաբաթում հնարավոր կլինի ձևակերպել ակնկալվող նոր հայեցակարգը։
Աշխարհը փոխվում է, հայ ժողովուրդը նոր աշխարհակարգի գաղափարական սկզբունքների ձևավորման խնդրում առաքելություն ունի։
Դա է մեր դիրքերը միջազգային ասպարեզում վերականգնելու, ամրապնդելու, ու ազգային շահերը հետապնդելու կարևոր կռվաններից մեկը»։