Իլհամ Ալիևը գոհ է Ղարաբաղի հարցում ԵՄ դիրքորոշումից

«Պատերազմից հետո մեր շփումները Եվրոմիության հետ ավելի ինտենսիվ դարձան։ ԵՄ-ն նույնպես ընդունել է հետկոնֆլիկտային շրջանի իրողությունները»,- այս մասին ապրիլի 12-ին ասել է Ադրբեջանի նախագահ Իլհամ Ալիևը՝ այս տարվա առաջին եռամսյակի արդյունքներին նվիրված հանդիպմանը։

Հակառակորդ պետության ղեկավարի խոսքով՝ «Եվրոմիության խորհրդի նախագահ Շառլ Միշելի նախաձեռնությամբ դեկտեմբերին և ապրիլին կայացել են եռակողմ հանդիպումներ։ Այս հանդիպումների մասին տեղեկություն է տրվել։ Իհարկե, թե՛ փորձագետները, թե՛ ադրբեջանական հանրությունը տեսան, որ վերջնական կոմյունիկեի մեջ չկա «Լեռնային Ղարաբաղ» անվանումը, ինչը բնական է։ Քանի որ Ադրբեջանն ընդդիմանում էր դրան, չկա նաև «հակամարտություն» բառը։ Դա բնական է, քանի որ հակամարտություն չկա։ Հակամարտությունը լուծված է»։