Ֆրանսիան կալանքի տակ է առել ռուս միլիարդատիրոջ կնոջ հյուրանոցները

Ֆրանսիայում՝ Լազուր ափին, երկու հյուրանոց են կալանքի տակ առել, որոնք պատկանում են ռուս միլիարդատեր Գենադի Տիմչենկոյի կնոջ ընկերությանը։ Այս մասին հայտնում է The Insider-ը՝ հղում կատարելով ռուսական Transparency International-ի փոխտնօրեն Իլյա Շումանովին։

Ըստ տեղեկությունների, դրանցից մեկը չորսաստղանի Grand Coeur & Spa հյուրանոցն է, որը գտնվում է Meribel լեռնադահուկային հանգստավայրում, և հինգաստղանի Hôtel Le Club de Cavaliere & Spa հյուրանոցը Լազուր ափին։ Հյուրանոցների հասցեները գտնվում են Ֆրանսիայի ֆինանսների նախարարության ցուցակում՝ սառեցման ենթակա գույքի ցանկով, ֆրանսիական ընկերությունների ռեգիստրի քաղվածքներից հետևում է, որ հյուրանոցների սեփականատեր Murgier Sports-ը (55%) վերահսկվում է Տիմչենկոյի կնոջ՝ Ֆինլանդիայի քաղաքացի Ելենա Էրմակովայի կողմից։

Հրատարակությունը հիշեցնում է, որ Տիմչենկոն պատկանում է «Վոլգա» մասնավոր ներդրումային խմբին, նրա ակտիվները գնահատվում են 22 միլիարդ դոլար, «Վոլգան» ներդրումներ է կատարում Ռուսաստանի տնտեսության մի քանի առանցքային ոլորտներում, ինչպես նաև «Ռոսիա» բանկի բաժնետեր է։ Տիմչենկոն Forbes-ի վարկածով ամենահարուստ ռուսների ցուցակում վեցերորդն է։ Նա համարվում է նախագահ Վլադիմիր Պուտինի վստահելի անձանցից մեկը։