«Ո՞վ է այդ մոնոպոլ և գերշահույթ ստացող կազմակերպության սեփականատերը». Գրիգորյան

«Կասեցում» շարժման ղեկավար, գործարար Սամսոն Գրիգորյանի գրառումը․ «Անչափ կարևոր, եթե դու տնտեսվարող ես, կամ որևէ կերպ առնչություն ես ունենալու հուլիսի 1-ից ուժի մեջ մտնող անկանխիկի մասին օրենքի հետ։
Տիգրան Քեյանի իրագործմամբ, որոշեցինք նամակ հղել ՊԵԿ-ին և ԿԲ-ին՝ հարցնելով՝ հնարավո՞ր է արդյոք անկանխիկ գործարքները կատարել էլեկտրոնային դրամապանակներով և այլևս պարտադրված չլինել քարտերով և պոս տերմինալներով գործարք կատարել։ Մի քանի ամիս անց, այդպես էլ նամակի պատասխանը չստանալով, այսօրվա կառավարության նիստում ականատես եղանք պրն Երիցյանի առաջարկին, որով օրենքում փոփոխություն է արվելու և առևտրի կետերում քարտերի սպասարկումը պարտադիր է լինելու։
Սա ընդունեք որպես տեղեկացում։
Հետագա քայլերով սկսեցի զանգահարել բանկեր և ճշտումներ կատարել։
Պարզվեց, որ գոյություն ունի ինչ որ կազմակերպություն (անվանումը ճշտել այդպես էլ չհաջողվեց), որից բանկերը պետք է 50.000 դրամով գնեն ծրագրային ապահովվման լիցենզի ամեն ՀԴՄ սարքի համար։
Դե քանի որ բանկերը բարեգործական ընկերություններ չեն, սույն ծախսը այսպես թե այնպես մնալու է տնտեսվարողի ուսերին, սրան գումարվում է նաև քարտերի սպասարկման միջնորդավճարները՝ 1,5%, 2%, 2,5% և ավելին։ Առանձին հրապարակումով կփորձեմ ներկայացնել, թե որ բանկը, ինչ պահանջներ է ներկայացնում պոս տերմինալների սպասարկման համար և ինչ գումարներ են գանձվելու տնտեսվարողներից։
Մինչ այդ պահանջում եմ ՀՀ կառավարությունից, տալ պարզաբանում.
Ինչո՞ւ է լիցենզիայի գումարն այսքան ԱՀՌԵԼԻ:
Ո՞վ է այդ մոնոպոլ և գերշահույթ ստացող կազմակերպության սեփականատերը և արդյո՞ք որևէ կապ ունի ԿԲ, ԱԺ և Կառավարության որևէ անդամի հետ։
Տեղյա՞կ եք արդյոք, թե քանի տասնյակ հազարավոր ՀԴՄ սարքեր պետք է ապահովվեն այս ծրագրով:
Աշխարհում քանի՞ նման մինի ծրագիր կա, որը նման ահռելի եկամուտ է բերում իր ստեղծողին։
ՀԳ. Հուլիսի մեկից հետո, խիստ մեղմ հաշվարկներով այդ ընկերությունը 1 միլիարդ դրամից ավելի գումարի լիցենզիա է վաճառելու»։