«Պատերազմի ամեն մի օրը խլում է 100-200 ուկրաինացի զինվորի կյանք». Պոդոլյակ

1586

Հինգշաբթի, 09 հունիսի, 2022 թ., 23:48

Ուկրաինացի զինվորականների կորուստները մարտերում այժմ տատանվում են օրական 100-200 մարդու սահմաններում, BBC-ին ասել է Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը։

Սա պատերազմի ընթացքում Ուկրաինայի զինված ուժերի զոհված զինծառայողների թվի ամենամեծ ցուցանիշն է։ BBC World Service Newshour ռադիոհաղորդմանը տված հարցազրույցում Պոդոլյակը նշել է, որ զոհերի թվի աճի պատճառը ռուսական բանակի զգալի առավելությունն է հրետանային մարտում։ Նա հավելել է, որ Ուկրաինան հավասարության կհասնի Ռուսաստանի հետ, եթե ստանա 150-ից 300 բազմակի հրթիռային կայանք։

Պոդոլյակի խոսքով՝ այս դեպքում Ուկրաինան կկարողանա «արդյունավետորեն ազատագրել իր տարածքը»։

Պոդոլյակն ընդգծել է, որ «քանի դեռ Ռուսաստանը լուրջ ռազմական պարտություն չի կրել, երկխոսության ոչ մի ձև հնարավոր չի լինի, և իրենք կշարունակեն փորձել գրավել մեր երկրի մի մասը»։