«Հոկտեմբերի 19-ից նոյեմբերի 9-ը ընկած հատվածը պետք էր նրա համար, որ թուրքերը հասնեն Շուշի»․ Գ․ Նազարյան

ԱԺ «Հայաստան» խմբակցության պատգամավոր Գեղամ Նազարյանի գրառումը․ ««Ասում են կանգնեցնեիք պատերազմը։ Ինչու մենք չէի՞նք մտածում պատերազմը կանգնեցնելու մասին։ Կամ ասում են կանխեիք պատերազմը, ինչու մենք չէի՞նք մտածում կանխելու մասին։ Առանց Շուշիի հնարավոր չէր պատերազմ կանգնեցնել կամ կանխել։ Հնարավոր չէր ուղղակի։ Ես մի քանի անգամ սա ասել եմ»- 2022-ի ապրիլի 14-ին այս մասին Ազգային ժողովում ի լուր աշխարհի հայտարարել է նիկոլ փաշինյանը:
Երեկ՝ 2022-ի հունիսի 17-ին, Մոսկվայում, Վլադիմիր Պուտինի հետ հանդիպման ժամանակ վահագն խաչատրյանն ասել է. «Իրականում մենք ուզում էինք ավելի շուտ դադարեցնել, ինչ-որ կերպ ավարտել պատերազմը, և ես գիտեմ Ձեր (Պուտինի) ջանքերը: Դուք հնարավորություն ունեիք հոկտեմբերի 19-ին (2020թ.)՝ այդ մասին մենք զրուցել ենք Սերգեյ Վիկտորովիչի (Լավրովի) հետ, երբ նա Երևանում էր, բայց այնպես ստացվեց, որ նոյեմբերի 9-ին (2020թ.) եղավ, բայց ամենակարևորը՝ պատերազմը կանգեցվեց»:
Հիմա ուշադրություն. հիշո՞ւմ եք պատերազմի և Շուշիի մասին ինչ է ասել նիկոլը: Նկատեցի՞ք, որ Պուտինի հետ զրույցում նախագահի պաշտոնը զբաղեցնողն օգտագործում է ինչ-որ կերպ ավարտել պատերազմն արտահայտությունը, իսկ հոկտեմբերի 19-ի չկայացած խաղաղության մասին խոսելիս չի շեշտում, թե ում մեղքով չդադարեց պատերազմը:
Մենք գործ ունենք ծանր հանցագործության մասին խոստովանության հետ:
Այսպիսով, համադրելով նիկոլի և խաչատրյանի հայտարարությունները ստացվում է, որ պատերազմը հոկտեմբերի 19-ին չի դադարել, քանի որ Շուշին թուրքերը, մեր հերոս տղերքի ջանքերով, չէին կարողանում գրավել: Ստացվում է, որ հոկտեմբերի 19-ինից, նոյեմբերի 9-ը ընկած հատվածը պետք էր բացառապես նրա համար, որ թուրքերը հասնեն Շուշի:
վահագն խաչատրյան, նիկոլ փաշինյանը, եթե ես սխալ եմ և ճիշտ չեմ ընկալել ձեր հայտարարությունները, ապա հայտարարեք, որ հոկտեմբերի 19-ին հրադադար չի հաստատվել Ադրբեջանի մեղքով, հայտարարեք, որ հոկտեմբերի 19-ին հրադադար չի հաստատվել, քանի որ Ադրբեջանը մերժել է ՌԴ նախագահ Վլադիմիր Պուտինի առաջարկը:
Եթե չեք անելու այս հայտարարությունը, ապա վայրկյան առաջ հավաքեք ձեր իրերը և ինքնակամ հեռացեք այնտեղ, որտեղ պետք է լինեիք արդեն ամիսներ շարունակ:
Հոկտեմբերի 19-ից հետո մենք Շուշի ենք կորցրել, Հադրութի շրջան, Մարտունու շրջանի մի կարևոր հատված, գյուղեր, քաղաքներ, եկեղեցիներ: Հոկտեմբերի 19-ից հետո երկու հազարից ավելի լույս տղա է զոհվել: Հիմա ասում եք ինչ-որ կերպ ուզում էինք ավարտե՞լ պատերազմը: Այդ ինչ-որ կերպը ո՞րն էր: Հիմա էլ Ռուսաստանին ու Իրանին եք համոզում, որ դեմ չկանգնեն, այսպես կոչված խաղաղության օրակարգին: Այն խաղաղության, որը Հայաստանը բզիկ-բզիկ է անելու, Հայաստանի ողնաշարը կոտրելու է: Հեռացեք: Քանի շատ ուշ չէ, հեռացեք»: