«Դիմում եմ քաղաքական, փորձագիտական, հանրային շրջանակներին». Վահրամ Աթանեսյան

Քաղաքական վերլուծաբան Վահրամ Աթանեսյանի գրառումը․ «Եվս մեկ անգամ դիմում եմ հայ քաղաքական, փորձագիտական, հանրային շրջանակներին և խնդրում, որ խոսույթից բացառեն «Լաչինի միջանցքի երկայնքով նոր ճանապարհ» ձևակերպումը։ Նոյեմբերի 9-ի հայտարարությունը հստակ սահմանում է, որ պետք է հաստատվի «Լաչինի միջանցքով տեղաշարժի նոր երթուղի»։ Լաչինի միջանցքի երկայնքով տեղաբաշխված է Ռուսաստանի Դաշնության խաղաղապահ զորախումբը։ Լաչինի միջանցքը Գորիս-Ստեփանակերտ ճանապարհ չէ, այլ՝ Լեռնային Ղարաբաղի և Հայաստանի կապը ապահովող տարածք, որի պարամետրերից հիմնականը՝ լայնությունը, նույնպես որոշված է՝ հինգ կիլոմետր։ Ոչ ոք նոյեմբերի 9-ի փաստաթուղթը չի չեղարկել, ուստի ցանկացած երթուղու դեպքում Հայաստանի և Լեռնային Ղարաբաղի միջև հինգ կիլոմետր լայնության ցամաքային անարգել կապը մնալու է ռուս խաղաղապահ զորախմբի վերահսկողության ներքո»։