«Փաշինյանի հանձնարարականի ֆոնին Ադրբեջանում հետաքրքիր զարգացումներ են». Վարդան Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրում է. «Կառավարության հուլիսի 7-ի նիստում Նիկոլ Փաշինյանը հրապարակավ հանձնարարեց համապատասխան գերատեսչություններին հնարավորինս օպերատիվ և համակարգված միջոցներ ձեռնարկել հուլիսի 1-ին Թուրքիայի հետ ձեռք բերված պայմանավորվածությունները կյանքի կոչելու համար: Երեկ գործող վարչապետը հայ-թուրքական պայմանավորվածությունների հարցը քննարկել էր Վլադիմիր Պուտին հետ: Հիշեցնեմ, որ խոսքը վերաբերում է երրորդ երկրների քաղաքացիների համար հայ-թուրքական սահմանը բացելուն, այդ թվում՝ և թերևս նախ և առաջ Ադրբեջանի, որը նույն հուլիսի 1-ին մինչև հոկտեմբերի 1-ը փակեց Նախիջևանում գործող միակ սահմանային անցակետը:

Կարծում եմ՝ ավելորդ է հիշեցնել, որ Թուրքիայի հետ մեր սահմանը հսկում են ռուսները:

Փաշինյանի հեռախոսազրույցի և հանձնարարականի ֆոնին հետաքրքիր զարգացումներ են Ադրբեջանում, որտեղ ընդդիմությունը նախատեսում է հուլիսի 13-ին կազմակերպել ցույց սահմանները բացելու պահանջով՝ միաժամանակ չթաքցնելով, որ բողոքի օրակարգը շատ ավելի ընդգրկուն է: Ցույցի մասին հայտարարությունը տարածել է մուսավաթական Թոֆիկ Յաղուբլուն. «Սա սկիզբն է և ստուգատես հասարակության պատրաստության զանգվածային խաղաղ բողոքի»:

Ադրբեջանում արդեն տևական ժամանակ է անընդհատ ու աճող դժգոհություն է դիտարկվում, բազմաթիվ բողոքի ցուցեր ուղղված իշխանությունների կամայականությունների դեմ, որոնց կենտրոնում Թարթառի սկանդալային դատավարության, պատերազմի վետերանների և մեր հայերիս հետ ուղղակի-անուղղակի առնչվող թեմաներն են: Ընդդիմության ներկա ակտիվությունը, ի դեպ, ոչ միայն սահմանային խնդիրների համատեքստում է զարգանում:

Երեկ տեղեկատվություն տարածվեց Արցախյան վերջին պատերազմի շահիդներից մեկի ողբերգական մահվան մասին, ով հուլիսի 4-ին ծեծի էր ենթարկվել փողոցում ոստիկանների կողմից, այնուհետև ոստիկանական տեղամասում 14 հոգու կողմից: Հանրային արձագանքը, կարծում եմ, կանխատեսելի էր, չեմ մեկնաբանի: Ինչևէ, թեման մեծ է ու կարևոր՝ բազմաթիվ շերտերով, կսահմանափակվեմ միայն մեկ արձանագրումով՝ հետհաշվարկն սկսված է և՛ իրենց, և՛ մեզ մոտ»: