«Հաջորդ իշխանությունը պետք է առ ոչինչ հայտարարի Նիկոլի ձեռք բերած ցանկացած պայմանավորվածություն»․ Սաղաթելյան

«Հաշվի առնելով, որ Նիկոլը կապ չունի մեր ժողովրդի շահերի և կամարտահայտության հետ՝ նախընտրական շրջանում իր պլատֆորմով և կառավարության ծրագրով ժողովրդին խոստացել է մի բան և հիմա անում է ամենևին ուրիշ բան՝ սպասարկում է Ադրբեջանի, Թուրքիայի շահերը՝ մի կողմ դնելով հայ ժողովրդի կենսական առաջնահերթ շահերը, հանդես ենք գալու նախաձեռնությամբ, որ հաջորդ իշխանությունը հրատապության կարգով պետք է առ ոչինչ հայտարարի Նիկոլի ձեռք բերած ցանկացած գրավոր և բանավոր պայմանավորվածություն»,- այսօր՝ Ֆրանսիայի հրապարակում հանրահավաքի ժամանակ հայտարարեց «Դիմադրություն» շարժման համակարգող Իշխան Սաղաթելյանը։

«Այս փաստաթուղթը վերջնական մշակելուց հետո առաջրկելու ենք, որ Հայաստանի բոլոր քաղաքական ուժերը, գործիչները ստորագրեն այդ փաստաթղթի տակ և որ ամբողջ աշխարհը, այդ թվում՝ Ալիևը, Էրդողանը հասկանան, որ Նիկոլի հետ ձեռք բերած ցանկացած պայմանավորվածություն առ ոչինչ է և որևէ իրավական նշանակություն չունի հայ ժողովրդի համար»,- նշեց նա։

Սաղաթելյանը հայտարարեց, որ հաջորդ հանրահավաքը տեղի կունենա հուլիսի 21-ին՝ հինգշաբթի օրը՝ ժամը 19։30-ին։