«Արմեն Գրիգորյանն առողջական լուրջ խնդիրներ, բողոքներ չի ունեցել, որ խափանման միջոցը փոխվեր»․ Անդրեասյան

«Նորից իմ խոր ցավն եմ արտահայտում․․․ Ցանկացած մարդու մահ ողբերգություն է, տվյալ դեպքում մենք հրապարակել ենք, որ ՔԿՀ-ում չի եղել բժշկական թեկուզ մեկ խնդիր, որը տեղում չի լուծվել իր հետ կապված, այսինքն չեն եղել լուրջ խնդիրներ, լուրջ բողոքներ չեն եղել, որ վերանայվի խափանման միջոցը», - այսօր՝ լրագրողների հետ ճեպազրույցում անդրադառնալով պրոդյուսեր Արմեն Գրիգորյանի մահվան դեպքին, ասաց արդարադատության նախարար Կարոն Անդրեասյանը։

«Ինչ վերաբերում է մնացած բոլոր կալանավորներին, ովքեր ունեն առողջական խնդիրներ, մենք ամեն ինչ անում ենք, որ չունենան պրոբլեմ։ Մենք իրենց մասին իսկապես հոգ ենք տանում», - նշեց նախարարը։

«Ցանկացած ողբերգություն պետք է ազդակ լինի բոլոր մարմիններին, այդ թվում՝ դատարաններին, էլ ավելի ուշադիր նայել, երբ բողոքներ կան ազատազրկված անձանցից»,- ընդգծեց Անդրեասյանը։

«Միևնույն ժամանակ ես հույս ունեմ, որ առանձին մարդիկ չեն շահարկի կամ չարաշահի որևէ դեպք, որևէ ողբերգություն, որ կեղծ առողջական խնդիրների անվան տակ փորձեն խուսափել արդարադատությունից»,- հավելեց նա։