«Իրենք չեն շտապում․ գիտեն, որ միևնույն է՝ մերժելու են բողոքը»․ փաստաբան

«ԲԴԽ որոշումը բացարձակապես իրավունք չի տալիս Ռուբիկ Մխիթարյանին այս գործը քննելու, ես վստահ եմ, որ նա ևս դա շատ լավ հասկանում է, բայց ԲԴԽ-ն է նման իրավիճակ ստեղծել: Այս մասին դատական նիստից հետո լրագրողների հետ զրույցում ասաց Աղվան Հովսեփյանի փաստաբան Երեմ Սարգսյանը՝ տեղեկացնելով, որ իր պաշտպանյալի գործով վերաքննիչ դատարանի դատավոր Ռ․ Մխիթարյանը ինքնաբացարկ չհայտնեց:

«Իրենք չեն շտապում, իրենք գիտեն, որ միևնույն է՝ մերժելու են բողոքը, ինչքան ուշ՝ էնքան լավ իրենց համար, և էսպես հանգիստ քնում են՝ մտածելով, որ իրենց որոշումից է կախված անձի ազատության իրավունքը։ Այս վատ երևույթը գոյություն ունի, և սա արդեն որերորդ անգամ տարբեր գործերով տեսնում ենք, բայց ունենք այն, ինչ որ ունենք, և նմանատիպ գործերով դատարանից արդարադատություն սպասելը շքեղություն է»,- ասաց փաստաբանը։

Հիշեցնենք՝ նախկին գլխավոր դատախազ, ՔԿ նախկին նախագահ Աղվան Հովսեփյանի փաստաբանները միջնորդել էին դատավորին՝ ինքնաբացարկ հայտնել: