«Ուշադրությունից դուրս մնաց մի հանգամանք». Հակոբ Բադալյան

Քաղաքական մեկնաբան Հակոբ Բադալյանի գրառումը. «ԵԱՀԿ Մինսկի խմբի համանախագահության «թեմայով» Վաշինգթոն-Բաքու «բանավեճի» ֆոնին հայաստանյան ուշադրությունից դուրս մնաց մի հանգամանք, ըստ իս՝ շատ նուրբ և նշանային հանգամանք: Դրան նախօրեի անդրադարձս՝ համանախագահության շուրջ այս օրերին աշխուժացած թեմայի համատեքստում, կտեղադրեմ մեկնաբանություն բաժնում:

Խոսքն իրանցի դիվանագետ, հոգևոր առաջնորդ Խամենեիի մերձավոր շրջանակից՝ Աբուլֆազ Զոհրավենդի խոսքերի ձայնագրության արտահոսքն է, որտեղ նա խոսում է, որ Ադրբեջանը սպառնալիք է, Նախիջևանը պետք է միացվի Իրանին և այլն: Ասել, թե իրանյան քաղաքական վերնախավի շրջանակում այդօրինակ տրամադրությունների առկայությունը Բաքվի համար գաղտնիք կամ նորություն է, կլինի մոլորություն:

Բայց, մի բան է այն, ինչ գիտես, մեկ այլ բան, երբ այդօրինակ խոսակցությունը գալիս է հրապարակ: Այդ դեպքում առաջանում է արձագանքի կամ դիրքորոշման, վերաբերմունքի խնդիր, կամ՝ լռությունը այդ դեպքում ստանում է որոշակի գին կամ արժեք:

Միևնույն ժամանակ, այդօրինակ ձայնագրության ի հայտ գալով, Իրանը թերևս որոշակի «անհարմար» վիճակում է հայտնվում Բաքվի առաջ, հատկապես եթե հաշվի առնենք, որ այս օրերին բավականին իտենսիվացել էր ՌԴ-Ադրբեջան-Իրան Հյուսի-հարավ օրակարգը: Դա թույլ է տալիս որոշակկիորեն նշմարել, թե ինչը կարող էր լինել ավելի լայն թիրախում և նաև շոշափել այս օրերին համանախագահության թեմայի աշխուժացման հնարավոր մոտիվների ավելի լայն շրջանակ: Ինչպես առիթ ունեցել եմ ասելու՝ այդ թեման ներկայումս ԱՄՆ համար գործիք է, ոչ թե նպատակ:

Ի դեպ, այդ ֆոնին հայտնի է դառնում, որ օգոստոսի 31-ին, երբ Բրյուսելում Շարլ Միշելի մասնակցությամբ կհանդիպեն Փաշինյանն ու Ալիևը, տեղի կունենա ՌԴ և Իրանի արտգործնախարարների հեռախոսազրույց, հարցերի լայն շրջանակով՝ միջուկային գործարքից, մինչև Կովկաս»: