«Բերդ խոշոր համայնքի ավագանու ՔՊ-ական թեկնածուների ցանկում՝ բազում գործազուրկներ և անտառապահներ». Ո. Սարգսյան

Լրագրող Ոսկան Սարգսյանի գրառումը․ «Բերդ խոշոր համայնքի ավագանու ՔՊ-ական թեկնածուների ցանկում՝ բազում գործազուրկներ, մեծ թվով անտառապահներ
Սեպտեմբերի 25-ին կկայանան Բերդ խոշոր համայնքի ավագանու համամասնական ընտրակարգով հերթական ընտրություններ։ Այդ ընտրություններում «Քաղաքացիական պայմանագիր» կուսակցության թեկնածուների թիվը 58 է, «Արդարություն» կուսակցության և «Քաղաքացու որոշում սոցիալ-դեմոկրատական կուսակցության ստեղծած դաշինքը՝ «Արժանապատիվ սերունդն» ունի 27 թեկնածու, «Իմ հզոր համայնք» և Վահան Բաբայանի «Ռեֆորմիստների» կուսակցությունների կազմած դաշինքը՝ «Զորավոր համայնքը» ներկայացել է 62 հոգանոց նախընտրական ցուցակ։ Բերդ խոշոր համայնքի ավագանու 21 տեղի համար գրանցված է ընդհանուր թվով 147 թեկնածու։ Ավագանու ՔՊ կուսակցության 58 թեկնածուների ցանկում 23-ը թիվ 38 ընտրածքային ընտրական հանձնաժողով ներկայացրած իրենց հայտարարագրերում նշել են, որ աշխատանք չունեն։ ՔՊ-ի նախընտրական ցուցակում շատ են պետական աշխատողները։ Ցուցակի առաջին համարը միասնական սոցիալական ծառայությունների Բերդի կենտրոնի տնօրեն Վահրամ Սուքիասյանն է, 3-րդ համարը՝ Բերդի բազմագործառնութային պետական քոլեջի տնօրեն Աննա Ավալյանը։ ՔՊ-ի թեկնածուների ցանկում ներառված են պետական հանրակրթական դպրոցի 4 տնօրեն, այդ դպրոցների 5 մանկավարժ, Արծվաբերդի անտառտնտեսության անտառապետ, տեղամասի պետ, անտառտնտեսության 5 անտառապահ, ՀՀ պաշտպանության նախարարության տրանսպորտի պատասխանատու, Բերդի ԲԿ-ի ինֆեկցիոն բաժանմունքի վարիչ, պետական բժշկական հիմնարկների 2 աշխատող, տարբեր հիմնարկների երկու վարորդ և այլն»։