««Հայաստան» խմբակցությունը կառավարության գրավոր պատասխանին է սպասում, ինչը թույլ կտա դատական նոր գործընթաց սկսել». Արծվիկ Մինասյան

ԱԺ «Հայաստան» խմբակցության քարտուղար Արծվիկ Մինասյանը «Երկիր Մեդիա»-ին տված հարցազրույցում տեղեկացրել է, որ իրենք հարցադրումներ են ուղարկել կառավարությանը։ Այդ հարցադրումները վերաբերում են իշխանությունների՝ 2021 թվականի նախընտրական ծրագրի մոտեցումներին, որոնք համադրվել են կառավարության ծրագրի, նաև 2022 թվականի տարեկան զեկույցի ձևակերպման հետ․ «Երբ 2018-ին գալիս էին իշխանության, բոլորս հիշում ենք, թե ինչ ամպագոռգոռ հայտարարություններ էին անում։ Մեր քաղաքացիները պետք է համացանցում հետևեն նրանց հայտարարություններին, նախընտրական խոստումներին, թե ինչպիսի հայտարարություններ էին անում ՀՀ-ի ու Արցախի ուժեղ բանակի վերաբերյալ։ Մեր հայրենակիցների ճնշող մասին թվում է, թե այն, ինչ մենք ասում ենք, ուղղակի ուզում ենք վարկաբեկել գործող իշխանություններին, բայց այս փաստերի համադրումը ցույց է տալիս, որ հայ ժողովուրդը ապագա ունի, եթե Փաշինյանին հեռացնի իշխանությունից»,- հավելել է Մինասյանը։ Նրա խոսքով՝ ««Հայաստան» խմբակցությունը կառավարության գրավոր պատասխանին է սպասում, ինչը թույլ կտա նոր դատական գործընթաց սկսել ու վերջապես արթնացնել քաղաքացիներին»: