ԱՄՆ-ը մատնանշել է իր գլխավոր հակառակորդներին

Միացյալ Նահանգները Չինաստանը տեսնում է որպես գլխավոր աշխարհաքաղաքական մարտահրավեր, իսկ Ռուսաստանի հետ կապված՝ Մոսկվային զսպելու կուրս է որդեգրել։ Այս մասին հայտարարել է ԱՄՆ նախագահի ազգային անվտանգության գծով օգնական Ջեյք Սալիվանը, հայտնում է Սպիտակ տան կայքը։

Ճեպազրույցում նախագահի օգնականը խոսել է ԱՄՆ անվտանգության նոր ռազմավարության մասին։

«Մենք գիտակցում ենք, որ աշխարհաքաղաքական առումով Չինաստանը ներկայացնում է Ամերիկայի ամենամեծ աշխարհաքաղաքական մարտահրավերը: Եվ չնայած այն մեծ մասամբ լինելու է հնդխաղաղօվկիանոսյան տարածաշրջանում, այն ունի նաև գլոբալ հարթություն», - ասել է նա: Ջեյք Սալիվանը պարզաբանել է, որ Վաշինգթոնը չի ցանկանում աշխարհի կոշտ բաժանում բլոկների, սառը պատերազմ կամ բացահայտ առճակատում։

ԱՄՆ Ազգային անվտանգության ռազմավարության նոր տարբերակը պարունակում է 48 էջ։ Այն նախանշում է ԱՄՆ վարչակազմի ներքին և արտաքին քաղաքականության առաջնահերթությունները, ինչպես նաև թվարկում է երկրին սպառնացող հիմնական սպառնալիքները։

Վաշինգթոնը պատրաստվում է մրցակցել Պեկինի հետ և զսպել Մոսկվային։ «ՉԺՀ-ն և Ռուսաստանը գնալով ավելի են կապվում միմյանց հետ, սակայն նրանց առաջադրած մարտահրավերները տարբերվում են կարևոր առումներով: Մենք առաջնահերթություն կդարձնենք ուժեղ մրցակցային առավելության պահպանումը Չինաստանի նկատմամբ՝ միաժամանակ սահմանափակելով դեռևս սկզբունքորեն վտանգավոր Ռուսաստանին»,- ասել է ԱՄՆ նախագահի օգնականը: