«Երբեք դեմ չենք եղել Ստեփանակերտ-Բաքու երկխոսությանը». Դավիթ Բաբայան

Այսօր՝ հոկտեմբերի 14-ին, լրագրողների հետ ճեպազրույցի ընթացքում Արցախի ԱԳ նախարար Դավիթ Բաբայանն ասել է, որ իրենք երբեք դեմ չեն եղել Ստեփանակերտ-Բաքու երկխոսությանը․ «Ընդհակառակը, 1996-1997թթ-ից հետո, երբ Արցախը փաստորեն դուրս մնաց բանակցային գործընթացի մի հատվածից, մենք միշտ կոչ էինք անում վերականգնել այդ ձևաչափը և այդ ձևաչափի վերականգնումը մնացել է մեր օրակարգում:

Բայց այդ, բանակցությունները չպետք է տեղի ունենան միջազգային ճանաչված հարթակից դուրս: Գոյություն ունի մեկ միջազգային ճանաչված հարթակ, դա Մինսկի խումբն է, որի փաստաթղթերում նշված է, որ Արցախը և՛ հակամարտության, և՛ բանակցությունների կողմ է: Ադրբեջանն ասում է՝ մենք չենք բանակցելու որպես կողմի հետ: Մենք էլ ասում ենք՝ վերականգնվի ձևաչափը, բանակցենք: Բայց եթե ինչ-որ մեկը կարծում է, որ բանակցությունները կարող են ստանալ այն երանգը, որ աբորիգեն ինչ-որ մի ցեղախումբ՝ ի դեմս Արցախի, պետք է գնա, փոշմանած խնդրի, ասի՝ «կներես, մայր երկիր, այսինքն՝ Ադրբեջան, մենք մի ղալաթ ենք արել, հիմա գալիս ենք, ներողություն ենք խնդրում, նորից մեզ ընդգրկեք ձեր կազմ», դա չի՛ լինելու»,- ասել է Բաբայանը: