«Տեսնես ո՞վ է վարչապետին հուշել, որ ճիշտ կլինի վտանգի մասին բարձրաձայնել»․ Հոխիկյան

Լրագրող Նաիրի Հոխիկյանի գրառումը. «Վստահաբար հիշում եք, որ ավելի քան մեկ շաբաթ հրապարակումներ եմ անում թշնամու նոր ոտնձգության վտանգի մասին։
Լսել եք նաև, որ վերջին 7-8 օրերին Ադրբեջանը առաջնագծի ուղղությամբ կրակոցներ է արձակում և միաժամանակ պաշտոնական մեղադրանքներ է հնչեցնում, թե հայկական կողմն է խախտում հրադադարը։
Լավ է ուշ, քան երբեք, բայց ՀՀ վարչապետը վերջապես պաշտոնապես ասաց այն, ինչ օրեր շարունակ ահազանգում էի ես՝ առաջնագծի հայկական զորքին խնդրելով զգոն լինել, քանի որ թշնամին նոր հարձակման մտադրություն ունի։
Հետաքրքիր է, Նիկոլ Փաշինյանի անուղղելի հետևորդները հիմա էլ իրենց կուռքի՞ն են անվանելու վատ լուր բերող, խուճապ տարածող կամ նման մի բան՝ կարդալով նույն Փաշինյանի հետևյալ տողերը․ «Ադրբեջանը շարունակաբար Հայաստանին է վերագրում հրադադարի իր իսկ խախտումները: Ակնհայտ է, որ սա Հայաստանի դեմ նոր ռազմական ագրեսիայի պատրվակի ստեղծում է։ Հրադադարի ռեժիմը պահպանելու և սահմանների անվտանգությունն ապահովելու համար անհրաժեշտ է մշտական ​​միջազգային մեխանիզմ»։
Տեսնես ո՞վ է վարչապետի ականջին հուշել, որ ճիշտ կլինի վտանգի մասին բարձրաձայնել»։