«Տեղի է ունենում մի գործընթաց, որն ակնհայտորեն չի համապատասխանում ՀՀ շահերին»․ Արամ Օրբելյան

«Ի՞նչ է նշանակում 1929-ի քարտեզներով բանակցել դելիմիտացիայի և դեմարկացիայի շուրջ. ո՛չ Հայաստանը, և ո՛չ էլ Ադրբեջանը այդ ժամանակ որպես անկախ պետություններ, որպես միջազգային իրավունքի սուբյեկտներ՝ գոյություն չեն ունեցել: Երկուսն էլ եղել են միջազգային սուբյեկտ հանդիսացող ԽՍՀՄ կազմում ընդգրկված հանրապետություններ, որոնք սահմաններ չեն ունեցել: Տեղի է ունենում մի գործընթաց, որն ակնհայտորեն չի համապատասխանում ՀՀ շահերին: Տեղի է ունենում Հայաստանի պաղեստինացում. Պաղեստինի և Իսրայելի անկախացումից հետո պարբերաբար ընթացող բանակցությունների արդյունքում Պաղեստինի տարածքն անընդհատ փոքրանում է, Իսրայելինը՝ մեծանում․․․»,- 168.am-ի եթերում նշել է միջազգային իրավունքի մասնագետ, իրավաբանական գիտությունների թեկնածու Արամ Օրբելյանը:

Խոսելով ՀՀ իշխանությունների վարած քաղաքականության մասին՝ Օրբելյանն ասել է․ «Ես տեսնում եմ, որ 2018-ի հեղափոխությունը ՀՀՇ-ի ռևանշն էր: Պետք է ընտրենք այնպիսի իշխանություն, որը սուտ չի խոսում: Կարելի է վարել վատ քաղաքականություն, բայց դա չպետք է լինի սուտ. մարդիկ պետք է հասկանան՝ եթե մեկն անընդհատ սուտ է ասում, կամ մի բան հայտարարում է, հետո հերքում է ինքն իրեն՝ պատճառաբանելով, որ իրեն ճիշտ չեն հասկացել, նրան պետք չէ՛ ընտրել: Մեր խնդիրն է՝ չթողնել որևէ փաստաթուղթ ստորագրել»։