«Իշխանության քաղաքականության պատճառով է, որ Սոչիում Ալիևը 10։0 արեց Հայաստանին». Արթուր Խաչիկյան

Սթենֆորդի համալսարանի միջազգային հարաբերությունների դոկտոր Արթուր Խաչիկյանը 168 TV-ի եթերում խոսելով հոկտեմբերի 31-ին Սոչիում ընդունված հայտարարության մասին՝ նշել է․ «Սա մեր պարտությունն է, իշխանության քաղաքականության պատճառով է, որ Սոչիում Ալիևը 10։0 արեց Հայաստանին։ Բայց սա նաև նշան է, որ Ռուսաստանն այնպիսի ծանր իրավիճակում է, որ չի կարողացել պարտադրել Ադրբեջանին համաձայնել մի կետի շուրջ, որով կամրագրվեր Լեռնային Ղարաբաղ հասկացությունը։ Ինձ համար Ռուսաստանի այս ծանր վիճակը հասկանալի է, որովհետև այդ երկիրը տևական ժամանակ է՝ պատերազմում է ամբողջ Արևմուտքի դեմ, և այդ հայտարարությամբ չի ցանկացել առճակատման գնալ Թուրքիայի և Ադրբեջանի հետ։ Բնական է, որ թուլացող Ռուսաստանի ֆոնին ադրբեջանաթուրքական գործոնն է ուժեղանալու, բայց այս խնդիրներով հանդերձ՝ Ռուսաստանը չի փակել Արցախի հարցն ու հայտարարել է՝ կարգավիճակի հարցը պետք է թողնել սերունդներին»։

Այս ամենի համատեքստում Խաչիկյանը անդրադարձել է Արևմուտքի քաղաքականությանը․ «Իսկ ի՞նչ է ասում Արևմուտքը Արցախի 120 հազար հայ բնակչի հնարավոր ցեղասպանության մասին․ խոսում են ընդամենը մշակութային ինքնավարության և ինքնության պահպանման մասին, իսկ դա այն է, ինչն ասում է Ադրբեջանը, ինչը գրված է խաղաղության պայմանագրի Վաշինգտոնյան տարբերակում»։