«Ես գրել եմ՝ боевая готовность N1»․ Սեյրան Օհանյանը՝ իր հնարավոր ձերբակալության մասին

ԱԺ-ում ճեպազրույցի ընթացքում «Հայաստան» խմբակցության ղեկավար Սեյրան Օհանյանը լրագրողների դիտարկմանը՝ «ըստ մամուլի հրապարակումների՝ հնարավոր է մոտ ժամանակներս գլխավոր դատախազը մտնի ԱԺ և անձեռնմխելիությունից զրկելու գործընթաց սկսի իր, Վահե Հակոբյանի, Արմեն Չարչյանի նկատմամբ, և ձերբակալի», արձագանքել է․ «Ես տեղեկություն չունեմ, որ իմ նկատմամբ կարող են ինչ-որ վարույթ սկսել, այդ հարցերը պետք է տալ դատական, դատաիրավական մարմիններին, որոնք այդ արտահոսքը միգուցե տվել են։ Ինչ վերաբերում է անձեռնմխելիությանը, ես երբևիցե անձեռնմխելիության քողի տակ չեմ թաքնվել: Այդ առումով ես մտահոգություն չունեմ»:

Օհանյանը իր կնոջ՝ Ռուզաննա Խաչատրյանի ֆեյսբուքյան գրառմանն անդրադառնալով, որտեղ ասվում էր, որ՝ «Օհանյանին ձերբակալելու փորձը փորձանք է դառնալու», նկատել է․ «Դա անձնական գրառում է: Ես վախեցող անձնավորություն չեմ, իմ ընտանիքն էլ. մենք պատրաստ ենք ամեն ինչի: Դրա համար ես գրել եմ՝ «боевая готовность N1»: