«Բրիտանական ընկերության պահանջը պետք է ուղղված լիներ Ադրբեջանի կառավարությանը»․ Արտյոմ Երկանյան

Լրագրող, հեռուստամեկնաբան Արտյոմ Երկանյանը «Շանթ» հեռուստաընկերության եթերում անդրադարձել է Ադրբեջանի կառավարությունից Արցախի Կաշենի ոսկու հանքը շահագործելու կեղծ իրավունք ստացած «Anglo Asian Mining» բրիտանական ընկերության կողմից միջազգային ատյաններ դիմելու լուրերին․ «Ընկերությունը դիմել է մի շարք միջազգային կազմակերպությունների և պետությունների կառավարություններին՝ մասնավորապես՝ ՄԱԿ-ին, ԱՄՆ պետդեպարտամենտին, ԵՄ-ին, Բրիտանիայի արտգործնախարարությանը՝ ակնկալելով աջակցություն. մեջբերում եմ՝ «օրինական բիզնես շահերը պաշտպանելու համար և Կաշենի հանք իր աշխատակիցների ֆիզիկապես մուտք գործելու իրավունքն ապահովելու հարցում»: Բրիտանական ընկերության պահանջը, դժգոհությունը միանգամայն տեղին է, միայն թե այն պետք է ուղղված լիներ Ադրբեջանի կառավարությանը, քանի որ նրանք են վաճառել մի բան, ինչը իրենց չի պատկանել օրենքով»։

Հարցին՝ «եթե գործը հասնի դատական ատյաններ՝ ի՞նչ շանսեր կունենանք», Երկանյանը արձագանքել է․ «Քանի դեռ Արցախյան հիմնախնդիրը կարգավորված չէ, իսկ աշխարհում բացի Բաքվից և Անկարայից ոչ մի այլ մայրաքաղաքում չեն համարում խնդիրը կարգավորված, ուստի անորոշ է և՛ կարգավիճակը այդ տարածաշրջանի, և՛ դրա պատկանելիությունը․ Ադրբեջանը որևէ իրավունք չուներ վաճառել այդ հանքերը»,- ընդգծել է Երկանյանը։