«Փաստեր՝ հայկական դիվանագիտության ձախողման մասին». քաղաքագետ

Քաղաքագետ Սուրեն Սուրենյանցի գրառումը. «Փաստեր՝ հայկական դիվանագիտության ձախողման մասին

ԱՄՆ նախագահի ազգային անվտանգության հարցերով խորհրդական Ջեյք Սալիվանը երեկ Հայաստանի Անվտանգության խորհրդի քարտուղար Արմեն Գրիգորյանի և Ադրբեջանի նախագահի աշխատակազմի արտաքին հարաբերությունների դեպարտամենտի ղեկավար Հիքմեթ Հաջիևի հետ առանձին հեռախոսազրույցներում հորդորել է Բաքվին և Երևանին դիտարկել քայլեր, որոնք կթուլացնեն երկկողմ լարվածությունը և հիմք կդնեն բարիդրացիական հարաբերությունների համար, հաղորդում է Սպիտակ տունը:
Ըստ Սպիտակ տան հաղորդագրության, Սալիվանը նշել է ԱՄՆ-ի պահպանվող մտահոգությունը Լաչինի միջանցք մուտքի խոչընդոտման և այդ իրավիճակի հանգեցրած հումանիտար հետևանքների կապակցությամբ ու կոչ է արել ամբողջովին վերականգնել միջանցքով ազատ տեղաշարժը:
Մի քանի դիտարկումներ.
• ԱՄՆ-ը թեև կոչ է անում «ամբողջովին վերականգնել միջանցքով ազատ տեղաշարժը», բայց ստեղծված վիճակի պատասխանատվությունը չի դնում միայն Բաքվի վրա և «հորդորում է Բաքվին և Երևանին դիտարկել քայլեր, որոնք կթուլացնեն երկկողմ լարվածությունը»:
• Սպիտակ տունը խոսում է ոչ թե Լաչինի միջանցքի փակման, այլ «մուտքի խոչընդոտման» մասին, որը միանգամայն այլ իրավիճակի նկարագրություն է:
• Հայկական դիվանագիտության ձախողման մասին է խոսում այն փաստը, որ տարբեր մայրաքաղաքների հայտարարություններում հասցեականության ու պատասխանատվության բաղադրիչները շատ թույլ են»: