«Արմեն Գրիգորյանը փորձում է հայ-ռուսական հարաբերություններում նորից սեպ ավելացնել»․ Խոսրով Հարությունյան

«Ասել՝ Ռուսաստանի խաղաղապահ ուժերն են մեղավոր, դա նշանակում է՝ պարո՛ն խաղաղապահ ուժեր, կրակեք․ սա են իրենք առաջարկում, իսկ կրակել նշանակում է նախաձեռնել նոր ռազմական լուրջ բախում տարածաշրջանում»,- այս մասին «Երկիր Մեդիայի» եթերում ասել է Հայաստանի նախկին վարչապետ Խոսրով Հարությունյանը՝ անդրադառնալով ՀՀ իշխանությունների՝ ՌԴ-ին ուղղված քննադատություններին։

Հարությունյանի փոխանցմամբ՝ Անվտանգության խորհրդի քարտուղար Արմեն Գրիգորյանի պնդումը, որ Ռուսաստանը ստիպում է Հայաստանին միանալ Ռուսաստան-Բելառուս Միութենական պետությանը, առնվազն միամիտ է․ «Ենթադրել, որ այդ զույգը պատրաստ է Հայաստանին իր պրոբլեմներով վերցնել իր կազմ, առնվազն միամիտ է։ Այսօր Ռուսաստանը ոչ մեկին Միութենական պետության մեջ ներառելու ո՛չ ցանկություն ունի, ո՛չ էլ՝ հնարավորություն։ Այդ կերպ Արմեն Գրիգորյանը փորձում է հայ-ռուսական հարաբերությունների վրա նորից մեկ սեպ ավելացնել։ Նման մեկնաբանությունն ընդամենը փորձում է ստեղծված իրավիճակը նորից կապել ոչ թե սեփական անգործության կամ գործողություների հետ, այլ՝ վերագրել այլոց»,- ընդգծել է Հարությունյանը։