«Ժամանակակից դեմոկրատիան վերածվել է ապօրինի շահերի հուսալի պաշտպանության օրինականացված գործիքի». Գ. Դանիելյան

ՀՀ արդարադատության նախկին նախարար Գևորգ Դանիելյանի գրառումը. «Դեմոկրատիայի առնչությամբ մարդկությունն ընտրություն է արել ոչ թե լավի ու վատի, այլ վատի ու վատագույնի միջև։ Արդարացի ու ներկայացուցչական ընտրություններն ամուր պետության հիմքն են, սակայն արդի պատկերացումները դեմոկրատիայի առնչությամբ ընդհանուր եզրեր անգամ չունեն վերջինիս ակունքների հետ։ Զուտ բառարանաբանության հարթությամբ «դեմոկրատիան» թարգմանվում է «ժողովրդավարություն», սակայն պատմականորեն ժողովուրդը կազմված էր միայն «դեմոսից» որը, ի տարբերություն օխլոսի, օժտված էր ընտրելու իրավունքով։ Պատահական չէ, որ դեմոկրատիայի արդի պատկերացումներից օգտվող, ինչ-որ տեղ նաև չարաշահող գործիչները սևացնում են «վտանգավոր» էլիտան, պատահական չէ նաև, որ ներկայիս պատկերացումների համատեքստում «դեմոկրատիան» առավելապես նույնացվում է «ԴԵՄՈՆկրատիայի» հետ։
Կարճ՝ ժամանակակից դեմոկրատիան վերածվել է սոսկ ապօրինի շահերի հուսալի պաշտպանության օրինականացված գործիքի, ինչով էլ թելադրված է նաև միջազգային հարթությամբ ներկայիս բարբարոսությունների նկատմամբ ամենաթողությունը և մարդու իրավունքների խախտումների նկատմամբ բացահայտ ընտրանքային վերաբերմունքը։
Հ.Գ. ցավոք, շատ բան է արվում, որ Արցախը հենց այդ կեղծ դեմոնկրատիայի զոհերից հերթականը լինի, այս անգամ չի ստացվելու՝ հենց դեմոնկրատիայի ներքին ճաքերի շնորհիվ»: