«Թշնամին իմացավ, որ հայ զինվորները նման բալագաններում են, իսկ բանակի արդիականացումը փուչիկ է»․ Լևոն Բարսեղյան

«Ասպարեզ» մամուլի ակումբի խորհրդի նախագահ Լևոն Բարսեղյանը գրել է. «Պատգամավորներին, մեծ ու փոքր պաշտոնյաներին՝ էգ ու որձ, արժե խաթրով, համոզելով, խաբելով տանել այսպիսի զինվորական կացարաններ, երկաթե շղթայով կապել այդ կացարանի պատին, այնպես, որ զուգարանը, ու հացուջուրը հասանելի լինի, բրախել ու ասել, յոլա գնացեք, մեկ շաբաթից կգանք:
Տաս օրից խելքները գլուխները կգա. կա´մ հրաժարական կտան, կա´մ կսկսեն աշխատել:
Ի՞նչ է նշանակում երկաթե ճաղավանդակով, մեկ մուտքով զինվորական կացարան, էն էլ հարվածային դրոնի հասանելիության գոտում: Ի՞նչ է նշանակում կողքը վառելափայտը դարսած, բայց բենզին լցնելով կրակ վառող կամ կրակը վառ պահող զինվորականն սպա: Ի՞նչ է նշանակում հրամաններ տալ ու չհսկել դրանց կատարումը:
Ի դեպ թշնամին իմացավ այս ամենը, նաև իմացավ, որ նման բալագաններում զինվորականներ են մնում, պայթյունի ու ականազերծման մասնագետ զինվորներ, իմացավ, որ ՀՀ բանակի արդիականացումը փուչիկ է, իմացավ, որ Հայաստանին ոչ միայն զենք չեն ծախում, այլև վառարան չեն ծախում, այլև ռազմական շինությունների ինժեներ չկա, կամ կա՝ բայց իր կարողությունները իշխանություններին պետք չեն, որ սահմանի բերանին այսքան հարձակումներից հետո մեկտեղ կարելի է քնեցնել 18-20 հոգու, էլի ահագին բան կարող էր էս լուրից իմանալ ու ֆոտոներից դատել, բայց չպատմեմ»: