«Ի՞նչ է անում ԱԱԾ-ն՝ գերիների վերադարձի հետ կապված». Թագուհի Թովմասյան

«Ի՞նչ է անում ԱԱԾ-ն ու ի՞նչ արդյունքներ ունենք գերիների վերադարձի հետ կապված: Նախորդ տարվա հունվարից դադարեցված է Ադրբեջանի կողմից միակողմանիորեն անհետ կորածների աճյունների որոնման աշխատանքները և ստացվում է՝ այս պահին մենք որևէ գործողություն չենք անում»,- ԱԺ իր ելույթում, շեղվելով հիմնական թեմայից, ԱԱԾ փոխտնօրեն Անդրանիկ Սիմոնյանին հարց ուղղեց պատգամավոր Թագուհի Թովմասյանը:

Պատասխանելով պատգամավորին՝ Սիմոնյանն ասաց. «Ձեր ելույթը բացասական ենթատեքստ ուներ. երբ կգա գերիների, անհետ կորածների հանձնաժողովը և հրապարակային զեկույց կունենա, այդ հարցը կբարձրացնեք: Եթե դուք սպասում եք, որ ես պետք է հաշվետվություն ներկայացնեմ հանձնաժողովի գործունեության վերաբերյալ՝ չեմ կարող, որովհետև այդ թեմայով չեմ պատրաստվել»: Սիմոնյանը խորհուրդ տվեց դիմել ԱԱԾ և ստանալ պատգամավորին հետաքրքրող հարցերի պատասխանները: