Ռուսաստանը կարող է մոտ օրերս գրավել Բախմուտը. Սթոլթենբերգ

ՆԱՏՕ-ի գլխավոր քարտուղար Յենս Սթոլթենբերգը չի բացառում առաջիկա օրերին ռուսական զորքերի կողմից Բախմուտի հնարավոր գրավումը, որտեղ վերջին ամիսներին կատաղի մարտեր են ընթանում։
«Վերջին շաբաթների, ամիսների ընթացքում մենք տեսել ենք կատաղի մարտեր Բախմուտում և մերձակայքում: Մենք տեսնում ենք, որ Ռուսաստանը ավելի շատ զորքեր է նետում, ավելի շատ ուժեր, և այն, ինչ Ռուսաստանին պակասում է որակով, նրանք փորձում են լրացնել քանակով»,- ասել է Սթոլթենբերգը Ստոկհոլմում պաշտպանության նախարարների ոչ պաշտոնական հանդիպմանը:

Նա նշել է, որ Ռուսաստանի Դաշնությունը մեծ կորուստներ է կրում Բախմուտի շրջանում։

«Սակայն, միևնույն ժամանակ, մենք չենք կարող բացառել, որ Բախմուտն, ի վերջո, կարող է ընկնել մոտակա օրերին»,- ասել է գլխավոր քարտուղարը։

Այնուամենայնիվ, նա ընդգծել է, որ «պարտադիր չի, որ դա արտացոլի պատերազմի որևէ շրջադարձային կետ»:

«Դա պարզապես ցույց է տալիս, որ մենք չպետք է թերագնահատենք Ռուսաստանին: Մենք պետք է շարունակենք աջակցել Ուկրաինային»,- ասել է Սթոլթենբերգը։