Երևանի փոխքաղաքապետը բերման չի ենթարկվել, չի ձերբակալվել. հերքում

Երևանի փոխքաղաքապետ Գևորգ Սիմոնյանը ձերբակալված չէ, այս պահին իրավական որևէ կարգավիճակ չունի:

Այս մասին «Ֆեյսբուք»-ի իր էջում գրել է Երևանի քաղաքապետարանի լրատվության վարչության պետ Լևոն Սարդարյանը՝ հերքելով նաև այն լուրերը, թե Սիմոնյանին բերման են ենթարկել:
Գրառումն ամբողջությամբ՝ ստորև․

«Հարգելի գործընկերներ,

Քանի որ արդեն իսկ պատասխանել եմ շուրջ 40 հեռախոսազանգի և ենթադրում եմ՝ կարող է ևս 40 հեռախոսազանգ լինել, ապա գերադասելի եմ համարում այս պահին իմ ունեցած տեղեկատվությունը տեղադրել այստեղ: Երևանի փոխքաղաքապետ Գևորգ Սիմոնյանը ձերբակալված չէ, առավել ևս՝ ձեռնաշղթաներով կամ հարկադրանքի այլ ձևերով բերման չի ենթարկվել և, առհասարակ, այս պահին իրավական որևէ կարգավիճակ չունի:

Պարոն Սիմոնյանը՝ իր աշխատասենյակում խուզարկություն իրականացրած Հակակոռուպցիոն կոմիտեի աշխատակիցների հրավերով գնացել է կոմիտե՝ բացատրություններ տալու: Ընդամենը:

Խնդրում եմ դադարեցնել ապատեղեկատվության տարածումը՝ մի կողմից, իսկ մյուս կողմից շնորհակալ եմ իմ բոլոր այն գործընկերներին, որոնք զանգահարել են, տեղեկությունը ստուգել են և հետո են միայն հրապարակել այն»:
Ավելի վաղ տեղեկացրել էինք, որ այսօր Ազգային անվտանգության ծառայությունը խուզարկություն էր իրականացրել Երևանի քաղաքապետի տեղակալ Գևորգ Սիմոնյանի աշխատասենյակում: