«Ղարաբաղի հայ բնակչության անվտանգության հարցը բացառապես Ադրբեջանի ներքին գործն է». Հաջիև

759

Երկուշաբթի, 13 մարտի, 2023 թ., 10:06

Ադրբեջանի նախագահի օգնական Հիքմեթ Հաջիևը հարցազրույց է տվել Report-ին, որտեղ մասնավորապես ասել է հետևյալը. «Մենք հույս ունեինք խաղաղության համաձայնագիր ստորագրել մինչև 2022 թվականի վերջ, սակայն Հայաստանի ոչ կառուցողական դիրքորոշման պատճառով չկարողացանք:

Հայաստանն ի սկզբանե փորձել է Ղարաբաղի հարցը ներառել խաղաղության համաձայնագրում, սակայն այդ մոտեցումն անընդունելի է Ադրբեջանի համար։

Ղարաբաղում ապրող հայ բնակչության անձնական իրավունքների և անվտանգության հարցը բացառապես Ադրբեջանի ներքին գործն է, և Ադրբեջանը իր ինքնիշխանության հետ կապված հարցեր չի քննարկի երրորդ կողմի, այդ թվում՝ ՀՀ-ի հետ։

Ղարաբաղյան հակամարտությունը լուծված է. Ադրբեջանի համար ղարաբաղյան հարցը դուրս է եկել միջազգային օրակարգից. պատահական չէ, որ Բրյուսելի, Մոսկվայի, Պրահայի, Սոչիի հանդիպումների ժամանակ ընդունված փաստաթղթերում Ղարաբաղի մասին խոսք չկա։

Ղարաբաղում ապրող հայերի իրավունքների և անվտանգության հարցը կլուծվի Ադրբեջանի Սահմանադրությանը և օրենքներին համապատասխան»,- ասել է այդ երկրի պաշտոնյան: