«Խաղաղության կամ այլ պայմանագիր Ադրբեջանի հետ հիմա պետք չէ». Նաիրի Հոխիկյան

Լրագրող Նաիրի Հոխիկյանի թելեգրամյան գրառումը. «Իլհամ Ալիևի վերջին հայտարարությունը մեծ հաշվով հայկական շահերին օգտակար է։ Եթե ոմանք կարծում են, թե այդպես կոչված «խաղաղության պայմանագիրը» մեզ լավ բան կտա, ապա չարաչար սխալվում են։

1921 թվականից հետո Հայաստանի, Ադրբեջանի և Թուրքիայի միջև չի ստորագրվել որևէ իրավական փաստաթուղթ և չի գծվել որևէ օրինական սահման։ Մոսկվայի և Կարսի պայմանագրերը որևէ իրավական ուժ չունեն, ինչը նշանակում է, որ Արցախը, Նախիջևանը և նույնիսկ Թուրքիային անցած 24.000 քկմ տարածքը (Արարատ լեռը, Կարսը, Արդահանը, Ալաշկերտը ևն) միջազգային իրավունքի տեսանկյունից պատկանում են Հայաստանին։

Հիմա եթե Հայաստանը Ադրբեջանի հետ ստորագրի միմյանց սահմանները ճանաչող պայմանագիր, կնշանակի, որ մենք 100 տարի հետո իրավական ուժ ենք տալիս Կարսի պայմանագրին։

Իսկ եթե հիմա հնարավորինս ձգձգենք որևէ պայմանագրի ստորագրումը, մինչև կայունանանք ու ազգային իշխանությունով ուժեղ պետություն դառնանք, կկարողանանք վերականգնել այն, ինչը իրավունքով մեզ է պատկանում։

Մենք պետք է հասկանանք, որ մեր տարածաշրջանում սահմանները ավելի արագ են փոփոխությունների ենթարկվում, քան արևը կհասցնի խավարման փուլ անցնել, հետևաբար ինչպես Ադրբեջանը 26 տարի ձգձգեց ու զինվեց՝ հարմար պահի գործարք կնքելով Հայաստանի դավաճան իշխանությունների հետ, այնպես էլ մենք կարող ենք կարճ ժամանակ անց կրկին ազատագրել մեր հայրենիքի մեծ հատվածը։ Չմոռանանք, որ, օրինակ, Քարվաճառը ամեն ձմեռ նորից ազատագրելու հնարավորություն ունենք, ընդամենը պետք է լավ պատրաստվել։

Հետևաբար խաղաղության կամ որևէ անունով այլ պայմանագիր Ադրբեջանի հետ հիմա պետք չի»: