«Ապահովե՛ք նիստի բնականոն ընթացքը», «ինձ մի՛ թելադրեք». վիճաբանություն՝ ԱԺ-ում

Ինչպես հայտնել էինք, ԱԺ մարդու իրավունքների պաշտպանության և հանրային հարցերի մշտական հանձնաժողովն արատահերթ նիստում քննարկում է ՄԻՊ թեկնածու առաջադրելու հարցը:

Հիշեցնենք, որ «Քաղաքացիական պայմանագիր»-ը ՄԻՊ-ի պաշտոնում առաջադրել է Գլխավոր դատախազի տեղակալ Անահիտ Մանասյանի, իսկ «Հայաստան» և «Պատիվ ունեմ» խմբակցությունները՝ Էդգար Ղազարյանի թեկնածությունը:

Ղազարյանը դիտարկում արեց. «Ուզում եմ խնդրել, որպեսզի հավասար պայմաններ ապահովեք առաջադրված թեկնածուների համար: ՔՊ-ի կողմից առաջադրված թեկնածուն չի համապատասխանում ՀՀ սահմանադրության 192-րդ հոդվածի 2-րդ կետին, խնդրում եմ հայտարարել 20 րոպե ընդմիջում՝ առաջադրված թեկնածուին ինքնաբացարկի հնարավորություն տալու համար»: ՔՊ-ական Արթուր Հովհաննիսյանն ընդհատեց, ապա դիմելով հանձնաժողովի նախագահ Թագուհի Թովմասյանին՝ հորդորեց ապահովել նիստի բնականոն ընթացքը. «Պահպանե՛ք նիստի հատուկ ընթացակարգը, տվյալ անձնավորությունը չունի ելույթի իրավունք»,- ասաց նա: «Ինձ մի՛ թելադրեք... Դուք ի սկզբանե եկել եք ագրեսիվ տրամադրությամբ»,- պատասխանեց Թովմասյանը, ապա դիմելով Էդգար Ղազարյանին՝ ասաց, որ ընդմիջում հայտարարել չեն կարող և նման առաջարկի իրավասություն թեկնածուն չունի: