«Վաղը, եթե Չինաստանը գրոհի և զենքի ուժով փորձի վերցնել Թայվանը, ի՞նչ են անելու». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Միջազգային իրավունքի տեսանկյունից Թայվանը Չինաստան է, այսօր ասում են միջազգային իրավունքի «պարեկները»՝ ԱՄՆ գլխավորությամբ: Վաղը, եթե Չինաստանը գրոհի և զենքի ուժով փորձի վերցնել Թայվանը, ի՞նչ են անելու, ինչպե՞ս են արձագանքելու: Գուշակե՞նք երեք անգամից, թե՞ պարզից էլ պարզ է՝ Չինաստանին հռչակելու են հրեշ ու ենթարկելու են պատժամիջոցների:
Ինչո՞ւ նույնը չարեցին Ադրբեջանի հանդեպ: Որովհետև Ադրբեջանն իրենց սպառնալիք չէ, այլ՝ միջոց է իրենց համար:
Շատերը Եգիպտոսի ու Իսրայելի օրինակն են բերում, Սինայի օրինակը, շատ խելոք դեմքով միջազգային իրավունքի և քաղաքականության դասեր տալով «հետադեմ հայությանը»:
Սինայում էլ գործել է ոչ թե միջազգային իրավունքը, այլ՝ աշխարհաքաղաքականությունը, որովհետև Եգիպտոսն էլ անհրաժեշտ էր:
Հետևաբար, բացատրությունները, թե միջազգային իրավունքը Արցախի հարցում մեր կողմը չէր ու դա էր ամեն ինչի պատճառներից մեկը, մեղմ ասած համոզիչ չեն, առավել ևս աներկբա չեն: Եվ հատուկ ընդգծեմ, որ այդ տեսակետը չպետք է ենթարկել մանիպուլյատիվ բնորոշման՝ «ոչմիթիզականություն»:
Ամբողջ հարցը տնտեսական, քաղաքական, ռազմական, նաև հարկ եղած դեպքում արժեքային-մշակութային կշիռն է: Որևէ աշխարհաքաղաքականության հարցում փոխզիջման կողմ, սուբյեկտ դառնալու համար պետք է ապահովել այդ բալանսը:
Հակառակ դեպքում դառնում ես փոխզիջման օբյեկտ, ու քեզ բաժին է հասնում միայն աշխարհը չարի ու բարու բաժանելով մխիթարվելը, ու այդ հողի վրա էլ ներսի ինքնաոչնչացմամբ զբաղվելը»: