«Տանկերը դիպուկ խոցում էին թշնամուն, զինվորները՝ մաս-մաս լինում»․ Շուշիի թեժ մարտերի մասնակից

2020 թվականի նոյեմբերի 6-ին Շուշին 99 տոկոսով գրավված էր թշնամու կողմից։ Այս մասին Forrighst.am-ի հետ զրույցում ասել է Շուշիի համար մղվող մարտերի մասնակից սպաներից մեկը։ Նշենք, որ հրապարակումն իրականացվում է առանց զրուցակցի ինքնությունը բացահայտելու։

«Ամսի վեցին թշնամին մեզ դիմավորել է հենց Շուշիի մատույցներում, վստահ կարող եմ ասել, նոյմեբերի 6-ին Շուշին 99 տոկոսով թշնամու տիրապետության տակ էր»,-ասաց սպան՝ նշելով, որ նոյեմբերի 4-ին հրաման է ստացել մասնակցել Շուշիի պաշտպանությանը։ «Ամսի վեցին ինձ առաջադրանք տրվեց, ես պետք է տանկերի, զինտեխնիկայի միջոցով միջանցք բացեմ դեպի մեր ուժերը, որոնք արդեն պաշտպանություն են իրականացնում։ Շուշի մտնելու խաչմերուկին հանդիպեցինք հակառակորդին, այնքան թեժ մարտեր սկսվեց, որ մեր առաջխաղացումն արգելափակվեց»։

Հայկական կողմի երկու դասակը, որոնց յոթ տանկ էր ուղեկցում, Շուշիի մատույցներում թեժ մարտերի են մասնակցել։ Հենց այստեղ էլ հասկացել են, որ իրավիճակն անվերահսկելի է։ Հայ զինվորականները թշնամուն ոչնչացրել են բավականին մոտ հեռավարության վրա։ «Տանկերը դիպուկ խոցում էին հակառակորդին, անձամբ եմ տեսել, թե թշնամու զինվորները ոնց էին մաս-մաս լինում։ Մեր ստորաբաժանումն արդյունավետ ոչնչացրել է թշնամուն»,-բացառիկ մանրմասներ է պատմում պատերազմի մասնակիցը։

Ի դեպ, նոյեմբերի 6-ին, երբ, ըստ սպայի, Շուշիում անկառավարելի իրավիճակ էր և բերդաքաղաքն էլ արդեն 99 տոկոսով թշնամու վերահսկողության տակ էր, պաշտոնական քարոզչությունը՝ Նիկոլ Փաշինյանի գլխավորությամբ հայտարարում էին, որ «Շուշիի համար մարտերը շարունակվում են»։ Նիկոլ Փաշինյանն այս մասին գրառում էր կատարել նոյեմբերի 9-ին։ Շուշիի անկման հետ կապված ականատես եղանք նաև պաշտոնական Երևանի ու Ստեփանակերտի հակասություններին։ Հետո պետք է պարզվեր, որ Ստեփանակերտից նոյեմբերի 9-ի պարտությունից ժամեր առաջ հայտնած տեղեկությունը՝ Շուշիի կորուստի մասին, ճշմարտություն է։

Շուշին պաշտպանելու համար անհրաժեշտ միջոցներ չեն եղել, պատերազմից շուրջ երեք տարի անց ասում է թեժ մարտերին մասնակցած սպան։ «Կենդանի ուժը կար, բայց առանց ավիացիայի, առանց անօդաչուների և առանց բոլոր տեխնիկական միջոցների, որոնք մեզ կօգնեին առաջխաղացում ունենալ։ Ես բացի կենդանի ուժից և տանկերից ուրիշ ոչինչ չեմ տեսել»»։

Մանրամասները՝ տեսանյութում