ԱՄՆ պետքարտուղարության փոխխոսնակը՝ բրյուսելյան հանդիպման մասին

ԱՄՆ պետքարտուղարության փոխխոսնակ Վեդանթ Փաթելը նշել է, որ Վաշինգթոնը շարունակում է հավատալ, որ հնարավոր է հասնել Հայաստանի ու Ադբեջանի միջև կայուն խաղաղության, փոխանցում է «Ամերիկայի ձայն»-ը:
Անդրադառնալով Բրյուսելում տեղի ունեցած եռակողմ հանդիպմանը, Փաթելը նշել է. «Լրացուցիչ որևէ գնահատական չունեմ այս առնչությամբ։ Կողմերը կարող են իրենք մեկնաբանություններ անել: Ակնհայտ է, որ ԱՄՆ-ն այս բանակցությունների կողմ չի եղել: Սակայն հաշվի առնելով, որ դրանք այն բանակցությունների շարունակությունն են, որոնք մենք հյուրընկալել էինք Արլինգթոնում (շարունակում ենք հավատալ, որ դրանք կարևոր առաջընթաց էին), գտնում ենք, որ երկու երկրների միջև հնարավոր է կայուն խաղաղություն»,- ասել է պետքարտուղարության փոխխոսնակը: