ԱՄՆ պետդեպը՝ Մոսկվայում կայանալիք հանդիպման մասին

ԱՄՆ պետքարտուղարության փոխխոսնակ Վեդանթ Փաթելը լրագրողների հետ ճեպազրույցի ընթացքում վերահաստատել է Վաշինգթոնի մոտեցումը, այն է՝ խաղաղությունը Հայաստանի ու Ադրբեջանի միջև հնարավոր է: «ԱՄՆ-ը ողջունում է [գործընթացը] և շարունակում աշխատել՝ տևական ու արժանապատիվ խաղաղության հասնելու ուղղությամբ»,- «Ամերիկայի ձայն»-ի փոխանցմամբ՝ ասել է փոխխոսնակը:

Մեկնաբանելով մայիսի 25-ին Մոսկվայում Հայաստանի ու Ադրբեջանի ղեկավարների հանդիպման մասին տեղեկությունը՝ փոխխոսնակն ասել է. «Նա՝ [Հարավային Կովկասում բանակցությունների հարցերով ԱՄՆ պետքատուղարության ավագ խորհրդական Լուիս Բոնոն], շարունակում է ներգրավված լինել այս հարցում... ։ Մայիսի սկզբին մեր հյուրընկալած բանակցությունները որակում ենք կառուցողական: Կողմերն իրենք են համաձայնել որոշակի դրույթների շուրջ: Այժմ նրանք ավելի լավ են հասկանում միմյանց: Ողջունում ենք շարունակական երկխոսությունն այս թեմայի շուրջ»,- նշել է պետքարտուղարության փոխխոսնակը: