«Զոհված տղերքի ծնողների դեմ գործում են հստակ՝ մեկ տեղից կառավարվող պլանով». Վրթանեսյան

«Ռազմինֆո» մասնագիտացված կայքի համակարգող Կարեն Վրթանեսյանը ֆեյսբուքյան իր էջում գրել է. «Զոհված տղերքի ծնողների դեմ Ֆեյսբուքում (ենթադրում եմ՝ նաև այլ սոցցանցերում) ֆեյքային գրոհներն ակնհայտ է, որ կազմակերպված բնույթ ունեն, ակնհայտ է, որ գործում են հստակ՝ մեկ տեղից կառավարվող պլանով, նույն նարատիվներն են, նույն քարոզչական գիծը։
Ընդ որում, քարոզչական շեշտը ոչ թե Աշոտիկի հանդեպ կարեկցանք առաջացնելն է, այլ հենց ակտիվ հանրային դիրքորոշում ունեցող ծնողների հանդեպ ատելության հրահրումը։
Սրանով մյուս ծնողներին և ընդհանրապես դժգոհ մարդկանց ցույց են տալիս, թե «նայե՛ք, տեսե՛ք ինչ կարող ենք անել ձեզ հետ, եթե տեղներումդ սուս չնստեք»։
Ատելության այսպիսի քարոզարշավներ նիկոլական օկուպացիոն վարչակարգն անընդհատ է վարում, որովհետև տեղեկատվական դաշտում գերիշխանությունը Նիկոլի իշխանության ամենակարևոր հենասյուներից է, եթե ոչ ամենակարևորը։
Այսօր պատերազմում զոհվածների ծնողներն են, երեկ Ադրբեջանի դրոշը վառող տղան էր, մինչև այդ Ալենի հարձակման թիրախում հայտնված քաղաքացին, և այլն, և այլն։ Է՛լ չասեմ, օրինակ՝ Նազենի Հովհաննիսյանի դեմ ամիսներով շարունակվող քարոզարշավը...»: