«Նույնիսկ միջին վիճակագրական հայ քաղաքական գործչի «չի ձգում», ու՜ր մնաց՝ պետական գործչի». Ն. Մկրտչյան

Մամուլի ազգային ակումբի նախագահ Նարինե Մկրտչյանը ֆեյսբուքյան իր էջում գրել է. «Եթե ավելի վաղ Նիկոլ Փաշինյանը միայն նախկիններին էր մեղադրում Ղարաբաղը հանձնելու մեջ՝ չքմեղության քղամիդ հագնելով, ապա այսօրվա մամլո ասուլիսում նա կիսահերոսական կեցվածք էր ընդունել՝ հայտարարելով, որ Ղարաբաղը ճանաչել է Ադրբեջանի կազմում՝ իբր թե այդ երկրի տարածքային ամբողջականության շրջանակում։ Սա նշանակում է, որ Նիկոլը հայտարարում է, որ ինքն է հանձնել Ղարաբաղը և պատրաստ է ստորագրել այդ փաստաթղթի տակ։
Եվ ամենաազավեշտալին այն է, որ Փաշինյանն ինքն իրեն մեծարում է որպես «պետական գործիչ»՝ պետական գործչի պատասխանատվության, պետական շահերի ընկալման, համարձակության, մտահորիզոնի ընդգրկման, գործունեության, վարքագծի ու բառապաշարի մասին իր զրոյական պատկերացումներով։
Հանգուցյալ պետական գործիչները շրջվեցին շիրիմներում, իսկ ողջերը կարող են ինքնահրկիզվել, եթե Փաշինյանն իրենց կողքին է կանգնելու։ Նիկոլ Փաշինյանը նույնիսկ միջին վիճակագրական հայ քաղաքական գործչի «չի ձգում», ու՜ր մնաց՝ պետական գործչի։
Նիկոլ Փաշինյան «պետական գործիչը» Ալիևի, Էրդողանի, Պուտինի վախից պարբերաբար մարդկային և քաղաքական դողէրոցք է ապրում»։