«Ադրբեջանը հերթով ձևակերպում է՝ արդեն Հայաստանի նկատմամբ իր բոլոր իրավունքները». Սուրեն Սահակյան

Հասարակական գործիչ Սուրեն Սահակյանը ֆեյսբուքյան իր էջում գրում է. «Քաղաքական իրավիճակի գնահատման մեր չափորոշիչները ձևախեղված են։ Մենք մինչև հիմա չենք կարողացել հասկանալ, թե ո՞նց ստացվեց 94թ․ մեր հաղթանակը։ Դրանից հետո մեր վարքը հուշում էր, որ մեզ թվացել ա, թե հաղթանակը հավերժ ա։ Երբ Ռուսաստանը զինում էր Ադրբեջանին, էստեղ ասում էին, թե դա բիզնես ա։ Երբ Ադրբեջանը զինվում էր, էստեղ լուրջ-լուրջ խոսում էին, որ դա ռուսական զենք ա, որն անհրաժեշտ պահին չի կրակի։ Երբ Ադրբեջանը միջազգային հանրության առաջ Արցախի նկատմամբ իրավունքներ էր ձևակերպում, մենք ասում էինք, որ Արցախի հարցը արդեն վաղուց ուժով լուծել ենք «գետնի վրա», ոչ թե «ինչ-որ թուղթ-թամասով»։ Հիմա էլ Ադրբեջանը հերթով ձևակերպում ա արդեն Հայաստանի նկատմամբ իր բոլոր իրավունքները, իսկ մենք համոզված ենք, որ Հայաստանի գոյությանը ոչինչ չի սպառնում․ Մենք ՄԱԿ անդամ, ճանաչված պետություն ենք։
Սա շատ նման ա «Don't look up» ֆիլմի սցենարին, երբ ահռելի չափերի աստերոիդը մոտենում ա երկրին, անխուսափելիորեն բախվելու ա նրա հետ ու ոչնչացնի մեր քաղաքակրթությունը, գիտնականները զգուշացնում են դրա մասին, բայց հանրությունը շարունակում ա իր անհոգ կյանքը՝ զվարճալի շոուներով, իրենց առօրյա հոգսերով, ծաղրելով գիտնականների «ծայրահեղականությունը», իսկ կուսակցական գործիչներն էդ տեղեկատվությունը օգտագործում են՝ սպասարկելու իրենց այսրոպեական քաղաքական օրակարգը։
Պետք ա հասկանալ, որ խնդիրները չեն լուծվում գիտակցության էն մակարդակում, որի պատճառով դրանք ծագել են։ Էդ պարագայում «բախումն» անխուսափելի ա։ Մենք պետք ա փոխենք իրերին նայելու մեր կերպը, քաղաքական իրավիճակը գնահատելու մեր չափորոշիչները՝ դրանք համապատասխանեցնելով քաղաքագիտական գործող կատերգորիաներին»: