«Մոսկվան փորձում է «գին» բարձրացնել Էրդողան-Պուտին մակարդակի շփմանն ընդառաջ». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «ՆԱՏՕ Վեհաժողովի մեկնող Էրդողանը փաստացի ազդարարել է, որ Թուրքիան հավանություն չի տալու Շվեդիայի անդամությանը: Ակնառու էր, որ Վեհաժողովից առաջ ԱՄՆ բավականին ջանք գործադրեց Շվեդիայի անդամության հարցում Թուրքիայի հավանությունը ստանալու համար, ընդհուպ նախագահ Բայդենի՝ Էրդողանի հետ հեռախոսազրույցը, բայց արդյունքը կարծես թե բավարար չէ:
Թերևս այդ ֆոնին պետք է դիտարկել նաև «ազովական» գերեվարված հրամանատարներին Ուկրաինային վերադարձնելու Էրդողանի քայլը, որով նա ըստ էության իր համար «բացում» էր Շվեդիայի անդամության հարցում մերժումը շարունակելու նոր տարածություն:
Այլ կերպ ասած, գործնականում Ռուսաստանի հետ հակադրության տպավորությունը ավելի շուտ առերևույթ է այդպիսին, իսկ տողատակում՝ Մոսկվայի համար անշուշտ շատ ավելի կարևոր է այն, որ Անկարան շարունակի խոչընդոտել Շվեդիայի անդամությանը:
Ռուսաստանն, իհարկե, իր դժգոհությունն է արտահայտել «ազովական» հրամանատարների վերադարձի առնչությամբ, բայց Մոսկվան էլ թերևս իր հերթին փորձում է «գին» բարձրացնել Էրդողան-Պուտին մակարդակի շփմանն ընդառաջ»: