Սթոլթենբերգը հայտարարել է, որ Էրդողանը համաձայն է ՆԱՏՕ-ին Շվեդիայի անդամակցությանը

Թուրքիայի նախագահ Ռեջեփ Թայիփ Էրդողանը խոստացել է արագացնել ՆԱՏՕ-ին Շվեդիայի դիմումը խորհրդարան ներկայացնելու գործընթացը, հայտարարել է ՆԱՏՕ-ի գլխավոր քարտուղար Յենս Սթոլթենբերգը Վիլնյուսում Թուրքիայի և Շվեդիայի ղեկավարների հետ հանդիպումից հետո։
«Ես ուրախ եմ հայտարարել, որ նախագահ Էրդողանը համաձայնել է Շվեդիայի անդամակցության արձանագրությունը հնարավորինս շուտ վավերացման ուղարկել Ազգային մեծ ժողով... Սա պատմական օր է»,- ասել է նա։ Միևնույն ժամանակ, Սթոլթենբերգը չի կարողացել նշել կոնկրետ ժամկետներ, թե երբ է սպասվում Շվեդիայի վավերացումն ու վերջնական միացումը։
«Ժամկետները կհայտարարի թուրքական կողմը»,- ասել է կազմակերպության ղեկավարը՝ նշելով, որ ամեն ինչ կախված կլինի բացառապես տեղի խորհրդարանից։
Նա նաև ընդգծել է, որ այսօրվա արդյունքը ձեռք է բերվել այն բանից հետո, երբ Անկարան և Ստոկհոլմը պայմանավորվել են ընդլայնել համագործակցությունը ահաբեկչության դեմ պայքարում և ստորագրել համապատասխան փաստաթուղթը։
Անցյալ շաբաթ Թուրքիայի արտգործնախարար Հաքան Ֆիդանը հայտարարել էր, որ Շվեդիային անհրաժեշտ են գործողություններ, և ոչ միայն բարեփոխումներ՝ ապացուցելու համար ահաբեկչության դեմ պայքարում մոտեցումների փոփոխությունը։ Նրա խոսքով, օրենսդրական փոփոխություններն իմաստ չունեն, մինչ Թուրքիայում արգելված Քրդստանի աշխատավորական կուսակցության գործողությունները շարունակվում են երկրի փողոցներում։