«Ո՞վ է ձեզ իրավունք տվել՝ չեղարկել Արցախի ինքնորոշման իրավունքը»․ Արցախի պատգամավոր Մետաքսե Հակոբյանի հարցը

Արցախի ԱԺ «Արդարություն» խմբակցության պատգամավոր Մետաքսե Հակոբյանն ասուլիսի ընթացքում ձայնագրության միջոցով դիմեց ՀՀ վարչապետ Նիկոլ Փաշինյանին. «2018 թվականի իշխանափոխության և ձեր վարած քաղաքականության արդյունքում ահասարսուռ պատերազմ ստացանք, հանձվեց մեր հայրենիքի մեծ մասը, հետո խրոխտ հայտարարեցիք, որ այլևս Արցախի Հանրապետության երաշխավորը չեք: Դուք նույնիսկ Հայաստանի երաշխավորը չեք: Միևնույն ժամանակ ճանաչեցիք Ադրբեջանի տարածքային ամբողջականությունը՝ հատուկ նշելով, որ Արցախը ճանաչում եք Ադրբեջանի մաս: Իսկ ո՞վ է ձեզ իրավունք տվել՝ չեղարկել Արցախի բնիկ ժողովրդի ինքորոշման իրավունքը, որտեղի՞ց ձեզ իրավունք՝ ԼՂ տարածքը, որը դեռևս Ազգերի լիգան է վիճելի տարածք ճանաչել, համարել Ադրբեջանի մաս և այս ամենը բերել հասցնել ընդամենը հումանիտար խնդիրների դաշտ: Այն էլ՝ օգտագործելով Աղդամ-Ստեփանակերտ ճանապարհը: Ես ուղղակի առաջարկ ունեմ ձեզ՝ օգտվել այդ ճանապարհից և այդ հումանիտար բեռները տեղափոխել ձեր և ձեր թիմի այն անդամների խոհանոցներ, ովքեր կիսում են ձեր այս բոլոր տեսակետները: Որպես Արցախի Հանրապետության Ազգային ժողովի պատգամավոր՝ ես ձեզ արգելում եմ այսուհետ չեղարկել կամ նույնիսկ փորձ անել կասկածի տակ դնել մեր ինքնորոշման իրավունքը: Եվ կրկին անգամ ձևակերպում եմ հարցերս՝ իսկ ո՞վ եք դուք, որ Արցախը դնեք սակարկման, իսկ ո՞վ է ձեզ տվել իրավունք՝ առաջարկում եմ ասել այդ իրավունքը տվողների անունները, որ դուք կարող եք Արցախը՝ որպես մանրադրամ, օգտագործել և ի վերջո ձեր այդ քայլերի արդյունքում ի՞նչ է շահել կամ շահում Հայաստանի Հանրապետությունը»:

Փաշինյանը կոնկրետ պատասխանից խուսափեց. «Ըստ էության, տարբեր դրվագներով, սկսած խոհանոցից մինչև ինքնորոշման իրավունք, բազմիցս անդրադարձել եմ, ավելացնելու բան չունեմ: Համաձայն եմ, որ ես ԼՂ ժողովրդի հարցը պետք է չորոշեմ և ԼՂ ժողովրդի հարցը պետք է որոշեն ԼՂ ժողովրդի ներկայացուցիչները, ինչը ի դեպ իմ դիրքորոշումն է, որը ես որդեգրել եմ դեռևս 2018 թվականին»: