«Երթով շարժվելու եմ Եռաբլուր, որպեսզի իմ ընկերներին երդվեմ՝ այն գաղափարը, որի համար իրենք զոհվեցին, ես չեմ ծախելու». Սերոբ Նալթակյան

2016 թվականի ապրիլյան և Արցախյան 44-օրյա պատերազմների մասնակից Սերոբ Նալթակյանն Ազատության հրապարակի բեմից դիմեց հայ ազգին՝ միասնության ու պայքարի կոչ անելով: «Չկան սևեր ու սպիտակներ, ոտքի կանգնեք բոլորդ՝ հանուն Արցախի ու արցախցու փրկության: Ժամանակն է, որ միաբանվենք: Տարբեր բաժանումները, տարբեր -ականները միասին պատերազի դաշտում էին, իրար համար պատրաստ էին զոհվել, ու էդ ամբողջը կատարվում էր մի գաղափարի համար՝ Արցախը հայկական պահելու, փրկելու համար: Կոչ եմ անում բոլոր կարող ուժերին, հոգևորականներին, քաղաքական, ապաքաղաքական ուժերին, ամեն ինչ մոռանալ ու միաբանվել մեկ գաղափարի շուրջ: Ես որպես հայ զինվոր, որպես հայ տղա՝ այստեղից երթով շարժվելու եմ Եռաբլուր՝ իմ ընկերների մոտ, որպեսզի ևս մեկ անգամ երդվեմ՝ այն գաղափարը, որի համար իրենք զոհվեցին, ես չեմ ծախելու: Իմ ընկերների թափած արյունը չի վաճառվում: Եթե պետք լինի մեռնել, ես նորից եմ գնալու պատերազմ, նորից եմ իմ երեխաներին վերջին անգամ հրաժեշտ տալու, բայց թշնամական ծրագրերն այստեղ չեն գործելու»,- Եռաբլուր երթից առաջ հայտարարեց Սերոբ Նալթակյանը: