«Ճանապարհը բացվի՝ միանանք Մայր Հայաստանին». արցախցի բլոգեր Տիգրանը՝ ներկա իրավիճակի մասին

Արցախցի փոքրիկ բլոգեր, Ասկերանում ապրող Տիգրան Գաբրիելյանը «Հանրայինի» հաղորդավար Պետրոս Ղազարյանի հետ հեռավար տեսազրույցում պատմեց բլոգ բացելու իր մտադրության, այս օրերին Արցախում տիրող իրավիճակի ու տրամադրությունների մասին: Հարցին՝ բլոկադան քո կյանքում ինչ է փոխել, նա պատասխանեց. «Այն իմ կյանքում շատ բան փոխեց, դժվարացրեց: Բայց դե բլոկադային արդեն շատ մարդիկ հարմարվել են, իհարկե՝ ոչ նորածիններն ու քաղաքներում ապրող մարդիկ: Բլոկադան շատ մեծ խնդիրներ է առաջացրել Արցախում»: Ըստ Տիգրանի, ամենաշատը կարոտում է նախկին Արցախը՝ ավելի երջանիկ մարդկանցով, իսկ երազանքը՝ ճանապարհը բացվի՝ միանան Մայր Հայաստանին: Նա չի էլ ուզում տեսնել իր կյանքը Ադրբեջանի կազմում կամ էլ արտագաղթել Արցախից: «Ընդհանրապես ոչ մեկ չի ցանկանում ապրել Ադրբեջանի կազմում»,- հավաստիացրեց նա: