«Ռուսաստանի ԱԳՆ-ն հայտարարությունը տարածել է առանց Միրզոյանի հետ համաձայնեցնելու». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ «Պարզվեց, որ այսօրվա իմ հեգնական դիտարկումը այն մասին, թե Լավրովն ու Բայրամովը առանց Միրզոյանի են քննարկել ՀՀ-ից հեռացած ադրբեջանցիների վերադարձի հարցը, իրականություն է։ Պարզվեց նաև, որ Ռուսաստանի ԱԳՆ-ն հայտարարությունը տարածել է առանց Միրզոյանի հետ համաձայնեցնելու։
Հիշեցնեմ, որ համանման միջադեպ արձանագրվել էր նաև Բրյուսելում, երբ առանց Փաշինյանի հետ համաձայնեցնելու Միշելն իր հայտարարության մեջ ներառել էր Աղդամով հումանիտար մատակարարումներ իրականացնելու՝ Ադրբեջանի պատրաստակամության մասին կետը:
Չեմ բացառում, որ հայկական դիվանագիտությունը նոր մեթոդ է որդեգրել. բանակցել անթույլատրելին և հետո հերքել։ Բայց, այնուամենայնիվ, նույնիսկ հերքումն արդեն իսկ վկայությունն է հայկական դիվանագիտության ոչ կոմպետենտ և զրոյական կարգավիճակի։ Փաստորեն, դրսում որևէ մեկը հաշվի չի նստում ՀՀ ներկայացուցիչների հետ։ Այսպիսի սկանդալից հետո առնվազն հրաժարականի դիմումներ պետք է տեսնեինք։
Առավոտից գիշեր ինքնիշխանությունից, անկախությունից ճամարտակողներն այսօր Հայաստանն այն աստիճան են գլորել անդունդը, որ նույնիսկ իր իսկ մասին հայտարարություններում նրա կարծիքը չեն հարցնում»։